30 avqust – Beynəlxalq İtkinlər Günü ilə əlaqədar Bərdə rayonunda itkinlərin əziz xatirəsinə həsr olunmuş ilk rəsmi anım tədbiri keçirilib.

Dialoq.az xəbər verir ki, tədbirin təşkilatçısı şəhid qardaşlar Tahir və Mahir Cəfərovların bacısı, Bərdə şəhər 2 nömrəli kitabxananın müdiri Nərgiz Cəfərova olub.

Qeyd edək ki, 5-ci Bərdə Taborunun komandiri olmuş Tahir Cəfərov 1993-cü ildə Kəlbəcər istiqamətində gedən döyüşlərdə iştirak edib və həmin döyüşlər zamanı şəhid olub. Onun nəşi bu günədək tapılmayıb.

Anım tədbirinin əsas məqsədi itkin ailələrinin üzvlərini bir araya gətirmək, itkinlərin adlarını yad etmək və onların xatirəsini yaşatmaq olub.

Tədbir iştirakçıları əvvəlcə Bərdə Şəhidlər Xiyabanını ziyarət ediblər. Burada itkin şəhid Tahir Cəfərovun fotosunun yerləşdirildiyi naməlum məzarın önünə əklil qoyulub və onun xatirəsi yad edilib.

Daha sonra anım tədbiri rəsmi hissə ilə davam edib.

Tədbirdə Bərdə Rayon Ağsaqqallar Şurasının sədri Yaşar Zamanov, İcra Hakimiyyəti yanında Ailə, Qadın və Uşaq Problemləri üzrə Komissiyanın sədri Səfurə Hümbətova, Qarabağ müharibəsi veteranları, əlilləri və şəhid ailələri İctimai Birliyinin Bərdə rayon şöbəsinin sədri Etibar Hüseynova, Bərdə Rayon İcra Hakimiyyətinin nümayəndəsi Zeynəb Misirli, “Qürur” İctimai Birliyinin həmsədri, hər iki Qarabağ müharibəsinin iştirakçısı, qazi Bəxtiyar Hüseynov, pedaqoq Liza Cabbarova və hər iki müharibənin iştirakçısı, qazi Elbəy Məmmədov çıxış ediblər.

İtkin ailələrinin üzvləri də çıxış edərək yaxınları ilə bağlı xatirələrini bölüşüblər.

Anım tədbiri çərçivəsində vətənpərvərlik mövzusunda şeirlər səsləndirilib, həmçinin kitab və rəsm sərgiləri nümayiş etdirilib.

Dialoq.az