2026-cı il 27 avqust tarixində türk dünyası universitetləri arasında dayanıqlı inkişaf sahəsində əməkdaşlığın gücləndirilməsi, təcrübə və bilik mübadiləsinin genişləndirilməsi məqsədilə Türk Dünyası Universitetləri Dayanıqlı İnkişaf Şəbəkəsinin (TDÜSA/TWUSN) təsis olunması ilə bağlı onlayn formatda iclas keçirilib.

Ege Universitetinin təşəbbüsü və təşkilatçılığı ilə keçirilən görüşdə Mingəçevir Dövlət Universitetinin rektoru Anar Eminov, eləcə də şəbəkənin digər təsisçi universitetlərinin rektorları və nümayəndələri iştirak ediblər. TDÜSA-nın təsisçi universitetlərindən biri kimi Mingəçevir Dövlət Universitetinin bu təşəbbüsdə iştirakı universitetin beynəlxalq əməkdaşlıq və dayanıqlı inkişaf istiqamətində həyata keçirdiyi fəaliyyətlərin türk dünyası miqyasında genişləndirilməsi baxımından əhəmiyyətli addım kimi qiymətləndirilir.
Təsis toplantısının açılışında Ege Universitetinin rektoru və TDÜSA Şəbəkə Başçısı Prof. Dr. Musa Alcı çıxış edərək iştirakçıları salamlayıb və şəbəkənin yaradılmasının türk dünyası universitetləri arasında ortaq məqsədlər ətrafında əməkdaşlığın inkişafına mühüm töhfə verəcəyini vurğulayıb.

Daha sonra təsisçi universitetlərin rektorları və səlahiyyətli nümayəndələri çıxış edərək rəhbərlik etdikləri ali təhsil müəssisələri haqqında məlumat verib, şəbəkənin yaradılması təşəbbüsünü dəstəklədiklərini ifadə edib və dayanıqlı inkişaf sahəsində birgə fəaliyyət imkanlarına dair fikirlərini bölüşüblər.
Görüşdə Mingəçevir Dövlət Universitetini rektor Anar Eminov çıxış zamanı MDU-nun beynəlxalq əməkdaşlığın inkişafına, dayanıqlı inkişaf prinsiplərinin universitet həyatında tətbiqinə və bu istiqamətdə müxtəlif yerli və beynəlxalq təşəbbüslərdə fəal iştiraka xüsusi önəm verdiyi qeyd olunub. MDU-nun türk dünyası universitetləri ilə qarşılıqlı təcrübə mübadiləsinin, birgə layihələrin və akademik əməkdaşlığın genişləndirilməsində maraqlı olduğu diqqətə çatdırılıb.

Toplantıda TDÜSA-nın yaradılması, şəbəkənin fəaliyyətinin əsas istiqamətləri, strateji məqsədləri, struktur və idarəetmə modeli ilə bağlı məsələlər nəzərdən keçirilib. Həmçinin təsisçi universitetlərin təklif və qiymətləndirmələri dinlənilib, gələcək əməkdaşlıq istiqamətləri ətrafında fikir mübadiləsi aparılıb.
Türk dünyası universitetlərini dayanıqlı gələcək hədəfi ətrafında birləşdirmək məqsədi daşıyan TDÜSA-nın yaradılması ali təhsil müəssisələri arasında dayanıqlı inkişaf üzrə təcrübə və qabaqcıl təcrübələrin paylaşılması, birgə elmi-tədqiqat və layihələrin həyata keçirilməsi, akademik əməkdaşlığın gücləndirilməsi və ortaq təşəbbüslərin reallaşdırılması üçün yeni imkanlar formalaşdırır. Şəbəkənin fəaliyyətinin türk dünyası universitetləri arasında əməkdaşlıq və həmrəyliyin daha da möhkəmləndirilməsinə xidmət etməsi nəzərdə tutulur.

Qeyd edək ki, Türk Dünyası Universitetləri Dayanıqlı İnkişaf Şəbəkəsinin təsisçi universitetləri sırasında Türkiyədən Ege Universiteti – təsisçi və icraçı universitet, Qazaxıstandan Atyrau Universiteti, Azərbaycandan Azərbaycan Dövlət Aqrar Universiteti və Mingəçevir Dövlət Universiteti, Qırğızıstandan Qırğızıstan Respublikası Beynəlxalq Universiteti və Qırğızıstan-Türkiyə Manas Universiteti, Özbəkistandan isə Ürgənc Dövlət Tibb İnstitutu yer alır.

Mingəçevir Dövlət Universitetinin TDÜSA-nın təsisçi üzvü kimi bu beynəlxalq platformada təmsil olunması universitetin türk dünyası ali təhsil müəssisələri ilə əlaqələrinin inkişaf etdirilməsi, dayanıqlı inkişaf üzrə institusional təcrübəsinin bölüşülməsi və gələcəkdə birgə təşəbbüslərdə iştirakının genişləndirilməsi baxımından mühüm əhəmiyyət daşıyır.

.

.

.

.

.

.

.

.

.

.

.

Dialoq.az