Mingəçevir Dövlət Universitetində (MDU) mühəndislik istiqaməti üzrə təhsil alan magistrantlarla elmi tədqiqatların inkişafı, beynəlxalq akademik imkanlar və innovativ texnologiyaların tətbiqi mövzularında görüş keçirilib.

Görüş universitetin Dayanıqlı Enerji və Mühəndislik Sistemləri Tədqiqat İnstitutunun təşkilatçılığı ilə baş tutub. Bu barədə Mingəçevir Dövlət Universitetinin rektoru Anar Eminov özünün Facebook hesabında paylaşım edib.
Görüş zamanı magistrantların elmi potensialının inkişaf etdirilməsi, onların tədqiqat fəaliyyətinə daha fəal cəlb olunması, beynəlxalq akademik mühitə inteqrasiyası və gələcək peşəkar inkişaf perspektivləri ətrafında geniş fikir mübadiləsi aparılıb.

Müzakirələrdə xarici universitetlərdə təhsil və elmi tədqiqat imkanları, beynəlxalq mübadilə proqramları, birgə elmi layihələrin həyata keçirilməsi, nüfuzlu elmi jurnallarda məqalələrin nəşri, beynəlxalq konfranslarda iştirak və doktorantura təhsili məsələlərinə xüsusi diqqət yetirilib.

Eyni zamanda, dayanıqlı enerji, yaşıl texnologiyalar, rəqəmsal mühəndislik, süni intellektin mühəndislik sistemlərində tətbiqi və sənaye müəssisələri ilə birgə tədqiqatların aparılması istiqamətində magistrantların iştirak imkanları müzakirə olunub.
İnteraktiv şəraitdə keçən görüşdə magistrantların sualları cavablandırılıb, onların təklifləri dinlənilib. Elmi rəhbərlik, tədqiqat mövzularının düzgün seçilməsi və beynəlxalq akademik əlaqələrin genişləndirilməsi ilə bağlı tövsiyələr verilib.
Qeyd olunub ki, magistrantların yalnız nəzəri biliklərə yiyələnməsi deyil, həm də real elmi problemlərin həllində iştirak edən, innovativ düşüncəyə və müasir tədqiqat bacarıqlarına malik mütəxəssislər kimi formalaşması əsas hədəflərdəndir.

Universitet rəhbərliyinin yanaşmasına görə, müasir ali təhsil müəssisəsi yalnız biliklərin ötürüldüyü məkan deyil, həm də yeni biliklərin yaradıldığı, gənc tədqiqatçıların dəstəkləndiyi və elmi nəticələrin real sektorla əlaqələndirildiyi bir mühit olmalıdır.
Mingəçevir Dövlət Universitetində bu istiqamətdə həyata keçirilən təşəbbüslər magistrantların elmi fəaliyyətə marağının artırılması, beynəlxalq əməkdaşlıq imkanlarının genişləndirilməsi və innovativ düşüncəyə malik mütəxəssislərin yetişdirilməsi baxımından əhəmiyyət daşıyır.
Rektor Anar Eminov paylaşımında universitetin gələcək inkişafında tələbə və magistrantların roluna diqqət çəkərək bu fikri vurğulayıb: “Universitetimiz Sizinlə böyüyəcək, Sizinlə yüksələcək!”

.

.

.

.

Dialoq.az