Mingəçevir Dövlət Universiteti (MDU) elmin, təhsilin və mədəniyyətin inteqrasiyasının gücləndirilməsi, akademik biliklərin paylaşılması və beynəlxalq elmi-mədəni platformalarda təmsilçiliyinin genişləndirilməsi istiqamətində fəaliyyətini davam etdirir. Universitet bu məqsədlə 12-ci Bakı Beynəlxalq Kitab Sərgisində iştirak edir.

Qeyd edək ki, bu barədə Mingəçevir Dövlət Universitetinin rektoru Anar Eminov özünün Facebook sosial media hesabında paylaşım edib. Paylaşımda deyilir:
"2026-cı il oktyabrın 21-dən 27-dək Bakı Ekspo Mərkəzində keçirilən sərgi Azərbaycan Respublikasının Mədəniyyət Nazirliyinin təşkilatçılığı və SOCAR-ın əsas tərəfdaşlığı ilə baş tutur. “Həyat ekrandan böyükdür: bir uşaq, bir kitab, bir gerçək dünya” şüarı altında təşkil olunan tədbirdə dünyanın 32 ölkəsini təmsil edən iştirakçılar bir araya gəliblər.
Kitab mədəniyyətinin inkişafı, elmi mübadilənin təşviqi və mədəniyyətlərarası dialoqun genişləndirilməsi baxımından mühüm əhəmiyyət daşıyan sərgi nəşriyyatların, müəlliflərin, təhsil müəssisələrinin və kitabsevərlərin görüş platformasına çevrilib.
Sərgi çərçivəsində Mingəçevir Dövlət Universitetinin stendində ali təhsil müəssisəsinin elmi və akademik nəşrləri, professor-müəllim heyətinin tədqiqat əsərləri, eləcə də müəllim və tələbələrin müəllifi olduqları kitablar nümayiş etdirilir. Təqdim olunan nəşrlər universitetin elmi potensialını, akademik fəaliyyətini və bilik istehsalına verdiyi töhfəni əks etdirir.

MDU-nun əməkdaşları və könüllü tələbələri sərgi ziyarətçilərinə universitetin tədris prosesi, elmi-tədqiqat fəaliyyəti, beynəlxalq əməkdaşlıq əlaqələri və innovasiya istiqamətində həyata keçirdiyi işlər barədə ətraflı məlumat verirlər. Universitetin intellektual potensialının təbliğinə xidmət edən stend ziyarətçilərin diqqətini cəlb edir. Mingəçevir Dövlət Universitetinin beynəlxalq kitab sərgisində iştirakı yalnız elmi nəşrlərin təqdimatı ilə məhdudlaşmır. Bu iştirak, eyni zamanda, ali təhsil müəssisəsinin akademik nailiyyətlərinin daha geniş auditoriyaya çatdırılması, elmi düşüncənin təşviqi, müəlliflik fəaliyyətinin dəstəklənməsi və yeni əməkdaşlıq imkanlarının formalaşdırılması baxımından əhəmiyyətlidir.

Universitetin belə beynəlxalq platformalarda təmsil olunması regionda elmin və təhsilin inkişafına, akademik mühitin zənginləşdirilməsinə, həmçinin Mingəçevir Dövlət Universitetinin elmi və intellektual potensialının daha geniş miqyasda tanıdılmasına xidmət edir.
Mingəçevir Dövlət Universiteti bundan sonra da bilik və təcrübə mübadiləsinin genişləndirilməsi, elmi yaradıcılığın təşviqi və təhsil-mədəniyyət əlaqələrinin möhkəmləndirilməsi istiqamətində fəaliyyətini davam etdirməyi hədəfləyir,-Deyə rektor qeyd edib".

Dialoq.az