1 avqust 2026-cı il tarixində Mingəçevir şəhər Gənclər Evində Azərbaycan Jurnalistlər Birliyinin rəhbərliyi, EL TV-nin təşkilatçılığı ilə Mərkəzi Aran regionunda fəaliyyət göstərən media nümayəndələri ilə görüş keçirilib.
Görüşdə Azərbaycan Jurnalistlər Birliyinin sədri Elçin Şıxlı, Birliyin İdarə Heyətinin üzvləri və Mərkəzi Aran regionunda fəaliyyət göstərən media subyektlərinin nümayəndələri iştirak ediblər. Görüşün əsas məqsədi region mediasının mövcud vəziyyətini, onun qarşılaşdığı problemləri, media nümayəndələrinin üzləşdiyi çətinlikləri müzakirə etmək, onların təklif və təşəbbüslərini dinləmək olub.

Tədbirdə çıxış edən Azərbaycan Jurnalistlər Birliyinin sədri Elçin Şıxlı müasir medianın qarşısında dayanan əsas problemlərdən danışıb. O, medianın bugünkü vəziyyətinə toxunaraq dezinformasiyanın yayılması, qeyri-peşəkar yanaşmalar, reket jurnalistika və digər mənfi tendensiyaların media mühitinə təsirlərindən bəhs edib. Elçin Şıxlı bildirib ki, sağlam media mühitinin formalaşdırılması üçün peşəkar jurnalistikanın inkişafına, jurnalistlərin maarifləndirilməsinə və media subyektlərinin fəaliyyətinə daha ciddi diqqət göstərilməsinə ehtiyac var. Görüş zamanı region mediasının problemləri geniş müzakirə olunub. Mərkəzi Aran regionunda fəaliyyət göstərən jurnalistlər onları narahat edən məsələləri səsləndirib, təklif və xahişlərini Azərbaycan Jurnalistlər Birliyinin rəhbərliyinin diqqətinə çatdırıblar.

Görüşdə çıxış edən media nümayəndələri regionlarda fəaliyyət göstərən media subyektlərinə diqqətin artırılmasının vacibliyini vurğulayıblar. Qeyd olunub ki, regionlarda sağlam və peşəkar medianın formalaşması yalnız jurnalistlərin öz fəaliyyətindən deyil, həm də onların çalışdığı informasiya mühitindən, dövlət qurumları ilə media arasındakı münasibətlərdən və ictimaiyyətin mediaya yanaşmasından asılıdır. Bu baxımdan region mediasının inkişafına dəstək verilməsi, jurnalistlərin peşəkarlığının və media savadlılığının artırılması istiqamətində müxtəlif təlimlərin, seminarların və maarifləndirici tədbirlərin keçirilməsi təklif olunub. Eyni zamanda dövlət qurumları ilə media arasında informasiya mübadiləsinin daha sağlam və operativ qurulmasının vacibliyi diqqətə çatdırılıb.

Görüşdə çıxış edən yazıçı, Azərbaycan Yazıçılar Birliyinin və Azərbaycan Jurnalistlər Birliyinin üzvü, Dialoq.az xəbər saytının təsisçisi və baş redaktoru Natiq Əlisoy regional medianın qarşılaşdığı problemlərdən danışaraq Azərbaycan Jurnalistlər Birliyinin regional bölmələrinin yaradılmasının vacibliyini qeyd edib. Natiq Əlisoy qeyd edib ki, Azərbaycan Jurnalistlər Birliyinin regional bölmələrinin yaradılması region mediasının problemlərinin vahid platformada müzakirə olunmasına imkan verə bilər. O bildirib ki, həmin bölmələr vasitəsilə region jurnalistlərinin qarşılaşdıqları problemlər sistemləşdirilə, aidiyyəti qurumların diqqətinə çatdırıla və onların həlli istiqamətində ardıcıl fəaliyyət həyata keçirilə bilər.

Görüşdə regionlarda fəaliyyət göstərən media subyektlərinin stimullaşdırılması, onların maddi və mənəvi baxımdan dəstəklənməsi məsələsi də gündəmə gətirilib. Bildirilib ki, region mediasının yaşaması və inkişaf etməsi üçün yalnız peşəkar jurnalistlərin olması kifayət deyil. Eyni zamanda onların fəaliyyət göstərməsi üçün normal iqtisadi və informasiya mühiti də yaradılmalıdır. Media nümayəndələri regionlarda jurnalistikanın nüfuzunun artırılması, media savadlılığının yüksəldilməsi, peşəkar jurnalistikanın təşviqi və sağlam media mühitinin formalaşdırılması istiqamətində daha çox layihələrin həyata keçirilməsinin vacibliyini vurğulayıblar.

Dialoq.az