Tuncelidə 2020-ci il yanvarın 5-dən etibarən xəbər alınmayan universitet tələbəsi Gülistan Doku ilə bağlı istintaq çərçivəsində daha bir nəfər həbs edilib.

Dialoq.az TRT Haber-ə istinadən xəbər verir ki, Erzurum Baş Prokurorluğunun göstərişi ilə polis və jandarmanın koordinasiyasında aparılan araşdırma çərçivəsində keçirilən 5-ci dalğa əməliyyatı zamanı saxlanılan 10 şübhəlidən daha 2-nin istintaq prosedurları başa çatıb.

Sağlamlıq müayinəsindən keçirilən şübhəlilər Erzurum Ədliyyəsinə aparılıb. Prokurorluqda ifadələri alındıqdan sonra məhkəməyə göndərilən 2 şübhəlidən biri barəsində həbs qərarı çıxarılıb, digəri isə məhkəmə nəzarəti şərti ilə sərbəst buraxılıb.

Bununla da Erzurum və Tunceli Baş Prokurorluqları tərəfindən aparılan istintaq çərçivəsində həbs edilənlərin sayı 30-a yüksəlib.

Əməliyyat çərçivəsində saxlanılan digər 5 şübhəlinin istintaqı isə davam edir.

Qeyd edək ki, daha əvvəl polis dalğıcı Gürkan Gürdal həbs edilib, A.K. və V.İ. isə məhkəmə nəzarəti şərti ilə sərbəst buraxılıb. Baş Prokurorluq iki polis dalğıcı ilə bağlı verilən məhkəmə nəzarəti qərarından etiraz edib.

İstintaq çərçivəsində 2017-ci ilin iyulundan 2019-cu ilin iyulunadək Tunceli İl Jandarma Komandanlığında rəhbər vəzifələrdə çalışmış A.K. və onun həyat yoldaşı B.H.K., polis dalğıcları Gürkan Gürdal, A.K. və V.İ., daha əvvəl həbs edilən təhlükəsizlik qorucusu Fatih Ö.-nün övladları D.Ö., S.Ö. və N.M.Ö., həmçinin onun həyat yoldaşı S.Ö. və həmin dövrdə universitet tələbəsi olan P.B. saxlanılıb.
Dialoq.az