“Karvan” yeni mövsümə iddialı hazırlaşır.

Dialoq.az xəbər verir ki,Yevlaxın “Karvan” futbol klubunda yeni mövsümə hazırlıq prosesi davam edir.

Qarşıdakı yarışlara ciddi şəkildə hazırlaşan Yevlax təmsilçisi heyətin komplektləşdirilməsi və komandanın oyun səviyyəsinin yüksəldilməsi istiqamətində çalışmalarını davam etdirir.

Klubda həyata keçirilən əsas yeniliklərdən biri baş məşqçi postuna təcrübəli mütəxəssis Ramiz Məmmədovun təyin olunmasıdır. Azərbaycan futbolunda zəngin məşqçilik təcrübəsinə malik olan Ramiz Məmmədov müxtəlif illərdə bir sıra klublarda çalışıb və yerli futbol ictimaiyyətində tanınmış simalardan biridir.

Baş məşqçinin rəhbərliyi altında yeni mövsüm üçün formalaşdırılan heyət hazırlıq prosesinə cəlb olunub. Məşqlərdə futbolçuların fiziki hazırlığının artırılması, taktiki-texniki göstəricilərinin təkmilləşdirilməsi, oyun intizamının möhkəmləndirilməsi və komanda şəklində mübarizə aparmaq bacarığının inkişaf etdirilməsinə xüsusi diqqət yetirilir.

“Karvan”ın ev oyunlarına ev sahibliyi edən, 5 min tamaşaçı tutumuna malik stadionda da yeni mövsüm öncəsi müəyyən yeniliklər həyata keçirilib. Arenada həm meydan sahibi komanda, həm də qonaq kollektivlər üçün zəruri şərait yaradılıb. Komandaların istifadəsi üçün soyunub-geyinmə otaqları və digər müvafiq infrastruktur imkanları mövcuddur.

Klubun bazasında futbolçuların rahatlığı və hazırlıq prosesinin daha səmərəli təşkili məqsədilə yeni avadanlıqlar quraşdırılıb, məşq və bərpa prosesləri üçün imkanlar yaxşılaşdırılıb.
Qeyd edək ki, “Karvan” Futbol Klubu 2004-cü ildə təsis olunub və fəaliyyət göstərdiyi müddətdə Yevlaxın futbol ənənələrinin formalaşmasına mühüm töhfələr verib. Klubun əsas hədəfləri ölkə futbolunun inkişafına töhfə vermək, perspektivli gənc futbolçuları üzə çıxarmaq və Yevlaxı futbol sahəsində layiqincə təmsil etməkdir.

Yeni mövsüm ərəfəsində hazırlıqlarını davam etdirən “Karvan”ın qarşısına uğurlu nəticələr əldə etmək və azarkeşlərini sevindirmək məqsədi qoyulub. Klub rəhbərliyi mövsümə hazırlıq prosesinin planlı şəkildə davam etdirildiyini və komandanın qarşıdakı yarışlara maksimum hazırlıqla çıxması üçün bütün zəruri addımların atıldığını bildirib.

Dialoq.az