8 oktyabr 2026-cı il tarixində Mingəçevir Dövlət Universitetinin (MDU) rektoru Anar Eminov və universitetin əməkdaşları Vətən müharibəsində qəhrəmancasına şəhidlik zirvəsinə ucalmış məzun Əzəmi Hüseynovun şəhadətinin altıncı ildönümü münasibətilə Mingəçevir şəhərinin Şəhidlər xiyabanında yerləşən məzarını ziyarət ediblər.

Universitet kollektivi şəhidin xatirəsini dərin ehtiramla yad edib, məzarı üzərinə gül dəstələri düzüb. Ziyarət zamanı şəhidin ruhuna dualar oxunub, Vətən uğrunda göstərdiyi igidlik və fədakarlıq minnətdarlıqla xatırlanıb.
MDU nümayəndələri universitetin Vətən müharibəsində şəhid olmuş digər məzunlarının da məzarlarını ziyarət edərək xatirələrinə ehtiramlarını bildiriblər.

Qeyd edək ki, Əzəmi Hüseynov 2010–2014-cü illərdə Mingəçevir Politexnik İnstitutunda (indiki Mingəçevir Dövlət Universiteti) Energetika mühəndisliyi ixtisası üzrə ali təhsil alıb. O, 8 oktyabr 2020-ci il tarixində 44 günlük Vətən müharibəsi zamanı Suqovuşan istiqamətində gedən döyüşlərdə qəhrəmancasına şəhid olub. Azərbaycan Respublikasının Prezidenti tərəfindən “Vətən uğrunda”, “Suqovuşanın azad olunmasına görə” və digər medallarla təltif edilib.

MDU-da şəhid məzunların əziz xatirəsinin yaşadılması, onların həyat və döyüş yolunun gənc nəslə tanıdılması daim diqqət mərkəzində saxlanılır. Bu məqsədlə universitetdə mütəmadi olaraq anım tədbirləri, görüşlər və ziyarətlər təşkil olunur.

.

.

Dialoq.az