5 oktyabr 2026-cı il tarixində Mingəçevir Dövlət Universitetində (MDU) Beynəlxalq Müəllimlər Gününə həsr olunmuş “Sizinlə gələcəyə” adlı tədbir keçirilib. Professor-müəllim heyətinin və tələbələrin iştirak etdiyi tədbirdə müəllim əməyinə hörmət və minnətdarlıq ifadə olunub.

Tədbir Ümummilli Lider Heydər Əliyevin və ölkəmizin suverenliyi, torpaqlarımızın azadlığı uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Azərbaycan Respublikasının Dövlət Himni səsləndirilib, ardınca Heydər Əliyevin müəllimlik peşəsi haqqında fikirləri təqdim olunub.

Çıxış edən MDU-nun rektoru Anar Eminov professor-müəllim heyətini peşə bayramı münasibətilə təbrik edib, müəllimlərin tələbələrin bilik və bacarıqlarının, dünyagörüşünün və sosial məsuliyyət hissinin formalaşmasındakı rolunu vurğulayıb. Rektor universitetin dayanıqlı inkişafında peşəkar akademik heyətin əhəmiyyətini qeyd edib, təcrübəli müəllimlərin bilik və təcrübəsinin qorunmasının, gənc akademiklərin inkişafının dəstəklənməsinin vacibliyini diqqətə çatdırıb.

Daha sonra Humanitar fənlər kafedrasının müdiri dosent Esmira Cəfərova və Pedaqogika və psixologiya kafedrasının gənc müəllimi Səbinə Musayeva çıxış edərək təbriklərini bölüşüblər. Çıxışlarda müəllimlik ənənələrinin yaşadılması və müəllim-tələbə münasibətlərində qarşılıqlı etimadın əhəmiyyəti vurğulanıb.

Tələbələr müəllimlərinə ünvanladıqları təbrikləri doqquz dildə səsləndirərək minnətdarlıqlarını ifadə ediblər. Müxtəlif dillərdə təqdim olunan təbriklər mədəni müxtəlifliyə hörmət və qarşılıqlı anlaşma mesajları ilə yadda qalıb.

Tədbir birinci kurs tələbələrinin hazırladıqları bədii proqramla davam edib. Müəllimlərə həsr olunmuş şeirlər, gitara ifası, nağara və tarın müşayiəti ilə musiqi nömrələri, milli rəqs və xarici dildə mahnı təqdim olunub. Tələbələrin yaradıcı çıxışları tədbirə xoş ovqat bəxş edib, müəllimlərinə olan sevgi və ehtiramlarını əks etdirib.

Bayram münasibətilə Anar Eminov universitetin İqtisadiyyat və idarəetmə, Mühəndislik, Pedaqoji, Riyaziyyat və informasiya texnologiyaları fakültələrinin müəllimləri ilə də görüşüb, onlarla həmsöhbət olub. Görüşlərdə tədris və elmi fəaliyyət, tələbələrin peşəkar hazırlığı və universitetin inkişafına müəllimlərin töhfələri barədə fikir mübadiləsi aparılıb.

Tədbir çərçivəsində uzunmüddətli pedaqoji fəaliyyəti, tədris və elmi nailiyyətləri ilə seçilən bir qrup müəllim, eləcə də fəaliyyəti ilə fərqlənən gənc əməkdaşlar təltif olunublar.

.

.

.

.

.

.

.

.

.

.

.

Dialoq.az