5 Oktyabr – Beynəlxalq Müəllimlər Günü münasibətilə Mingəçevir Dövlət Universitetində təhsil və insan kapitalının inkişafında mühüm rol oynayan professor-müəllim heyətinin əməyinə həsr olunmuş tədbir keçirilib.

Tədbirdə Mingəçevir Dövlət Universitetinin rektoru Anar Eminov universitetdə uzun illər pedaqoji fəaliyyət göstərən, tədris və elmi fəaliyyəti ilə fərqlənən, eləcə də gənc nəslin peşəkar inkişafına töhfə verən müəllimlərlə görüşüb.
Görüş zamanı müəllim əməyinin yalnız auditoriya çərçivəsində deyil, universitetin ümumi inkişafı, tələbələrin formalaşması, elmi mühitin gücləndirilməsi və müasir təhsil ekosisteminin qurulmasında mühüm əhəmiyyət daşıdığı vurğulanıb.

Rektor Anar Eminov çıxışında bildirib ki, universitetin dayanıqlı inkişafının əsas şərtlərindən biri güclü və peşəkar akademik insan kapitalının formalaşdırılmasıdır. Qeyd olunub ki, Mingəçevir Dövlət Universitetində təhsilin keyfiyyətinin yüksəldilməsi, müasir tədris mühitinin yaradılması, rəqəmsal imkanların genişləndirilməsi və beynəlxalq standartlara uyğun universitet modelinin formalaşdırılması istiqamətində həyata keçirilən tədbirlərdə professor-müəllim heyətinin rolu xüsusi əhəmiyyət daşıyır.

Bildirilib ki, universitetin inkişaf strategiyasında müxtəlif nəsilləri təmsil edən müəllimlərin təcrübəsinin qorunması ilə yanaşı, gənc akademiklərin inkişafının dəstəklənməsi və onların universitetin gələcək inkişafında fəal iştirakının təmin olunması prioritet istiqamətlərdəndir.
Tədbirin davamında universitetdə səmərəli fəaliyyəti ilə seçilən bir qrup müəllim Beynəlxalq Müəllimlər Günü münasibətilə təltif edilib. Təltif olunanlar arasında uzun illərdir Mingəçevir Dövlət Universitetində çalışan təcrübəli müəllimlərlə yanaşı, gənc və peşəkar fəaliyyəti ilə fərqlənən əməkdaşlar da yer alıb.

Təltifetmə mərasimi universitetdə müəllim əməyinə verilən dəyərin, akademik fəaliyyətin təşviqinin və insan kapitalına yönəlmiş institusional yanaşmanın növbəti nümunəsi kimi yadda qalıb.
Qeyd edək ki, Mingəçevir Dövlət Universitetinin inkişaf konsepsiyasında keyfiyyətli təhsil, güclü insan kapitalı, innovasiya, rəqəmsallaşma və dayanıqlı inkişaf bir-birini tamamlayan əsas istiqamətlər kimi müəyyənləşdirilib.

.

.

.

.

.

.

.

.

Dialoq.az