Yevlaxda aparılan qazıntı işləri müvəqqətidir – yollar layihələr başa çatdıqdan sonra bərpa olunacaq.
Yevlax şəhərində həyata keçirilən içməli su və kanalizasiya sisteminin yenilənməsi işləri ilə əlaqədar aparılan qazıntılar son günlər şəhər sakinlərinin ən çox müzakirə etdiyi mövzulardan birinə çevrilib. Küçələrdə aparılan işlər nəticəsində bəzi yollarda hərəkət çətinləşib, bu isə sakinlərdə haqlı olaraq bir sıra suallar yaradıb. Şəhər sakinlərini əsasən düşündürən məsələ işlərin nə vaxt başa çatacağı, yolların nə zaman əvvəlki vəziyyətinə qaytarılacağı və şəhərdə həyata keçirilən infrastruktur layihələrinin nə vaxt yekunlaşacağıdır.

"Dialoq.az" xəbər verir ki, yaranmış suallara Yevlax Şəhər İcra Hakimiyyətinin başçısı Anar Tağıyev 22 İyul – Milli Mətbuat Günü münasibətilə media nümayəndələri ilə keçirdiyi görüşdə aydınlıq gətirib. Şəhərin sosial-iqtisadi inkişafı ilə bağlı fikir mübadiləsi zamanı şəhər rəhbəri hazırda Yevlaxda həyata keçirilən genişmiqyaslı infrastruktur layihələrindən danışıb.
Anar Tağıyev bildirib ki, şəhərdə yol, içməli su və kanalizasiya xətlərinin yenilənməsi istiqamətində mühüm layihələr icra olunur. Onun sözlərinə görə, bu layihələrin həyata keçirilməsi zamanı aparılan qazıntı işləri müəyyən müddət ərzində şəhər sakinləri üçün narahatlıq yaratsa da, bu, tamamilə müvəqqəti xarakter daşıyır.

Şəhər rəhbəri qeyd edib ki, hazırda icra olunan layihələr Yevlaxın mühəndis-kommunikasiya infrastrukturunun müasirləşdirilməsinə xidmət edir. O vurğulayıb ki, bütün işlər planlı şəkildə və mərhələli qaydada həyata keçirilir. Layihələr tam başa çatdıqdan sonra qazıntı aparılmış bütün ərazilər, eləcə də şəhərin yol şəbəkəsi müəyyən edilmiş plana uyğun şəkildə bərpa ediləcək.
Anar Tağıyev bildirib ki, hazırda sakinlərin qarşılaşdığı müvəqqəti çətinliklər görülən genişmiqyaslı infrastruktur layihələrinin ayrılmaz tərkib hissəsidir. Layihələrin yekununda isə Yevlax şəhərinin içməli su təchizatı, kanalizasiya sistemi və yol infrastrukturu daha müasir və dayanıqlı vəziyyətə gətiriləcək.

Görüş zamanı şəhər rəhbəri yalnız infrastruktur layihələri ilə kifayətlənməyərək şəhərin digər aktual məsələlərinə də toxunub. O, gənclərin sağlam inkişafı, düzgün sosiallaşması, idmana marağının artırılması, təhsilə münasibətinin gücləndirilməsi, vətənpərvərlik ruhunda formalaşdırılması və sağlam gələcəyin təmin olunması istiqamətində həyata keçirilən tədbirlərdən danışıb. Bildirilib ki, bu sahədə görülən işlər gələcəkdə sağlam düşüncəli, savadlı və cəmiyyət üçün faydalı gənc nəslin yetişməsinə xidmət edir.
Anar Tağıyev media nümayəndələrinə də müraciət edərək qeyd edib ki, gənclərin maarifləndirilməsində, düzgün istiqamətləndirilməsində və cəmiyyətə faydalı vətəndaş kimi formalaşmasında medianın rolu olduqca böyükdür. O, media nümayəndələrinə bu istiqamətdə maarifləndirici materiallara daha çox yer ayırmağı tövsiyə edib.

Şəhər rəhbəri çıxışında məşğulluq məsələsinə də toxunub. O bildirib ki, bu gün Yevlaxda savadlı, bacarıqlı və perspektivli gənclər kifayət qədərdir və onlar müxtəlif peşə sahələrində uğurla fəaliyyət göstərirlər. Bununla yanaşı, bəzi hallarda gənclərin peşə seçimində yanlış qərarlar verdiyini, seçdikləri sahəni dərindən öyrənmədiklərini qeyd edib. Nəticədə onların bir qismi ya işsiz qalır, ya da təklif olunan işlərə uyğunlaşa bilmir və həmin sahədə özlərini doğrultmaqda çətinlik çəkirlər.

Anar Tağıyev vurğulayıb ki, gənclər peşə və sənət seçiminə məsuliyyətlə yanaşmalı, seçdikləri sahəni dərindən mənimsəməli, daim öz üzərlərində işləməli, rəqabətqabiliyyətli, yaradıcı və yenilikçi olmağa çalışmalıdırlar.

Dialoq.az