Mingəçevir Dövlət Universiteti (MDU) Naxçıvan Dövlət Universitetinin təşkilatçılığı ilə keçirilən “Orqanik və dayanıqlı kənd təsərrüfatı: Ekoloji tarazlıq və dayanıqlı inkişaf” mövzusunda II Respublika Elmi Konfransında tərəfdaş qismində iştirak edib.

Mingəçevir Dövlət Universitetinin rektoru Anar Eminov bu barədə özünün “Facebook” sosial media hesabında paylaşım edib.
Rektorun sözlərinə görə, konfransın plenar iclasında çıxış edərək dayanıqlı kənd təsərrüfatı, iqlim dəyişmələri, ekoloji təhlükəsizlik və elmi innovasiyaların əhəmiyyətinə diqqət çəkib. O, həmçinin MDU-da yaşıl transformasiya, dayanıqlı enerji, su ehtiyatlarının idarə olunması və ekoloji monitorinq istiqamətlərində həyata keçirilən təşəbbüslər barədə məlumat verib.
Dörd əsas elmi istiqamət üzrə 11 bölmə iclasını və 90-dan çox elmi məruzəni əhatə edən konfransda biomüxtəlifliyin qorunması, ekoloji tarazlığın təmin edilməsi, orqanik əkinçilik və innovativ aqrar texnologiyalarla bağlı aktual məsələlər müzakirə olunub.

Anar Eminov qeyd edib ki, Mingəçevir Dövlət Universitetinin elmi əməkdaşlıq əlaqələrinin genişləndirilməsi, regional və respublika səviyyəsində birgə tədqiqatların təşviqi, yaşıl iqtisadiyyatın inkişafı və dayanıqlı inkişaf istiqamətində yeni tərəfdaşlıqların formalaşdırılması universitetin əsas prioritetləri sırasındadır.
Rektor konfransın yüksək səviyyədə təşkilinə, səmərəli elmi müzakirələrə və qarşılıqlı əməkdaşlığa görə Naxçıvan Dövlət Universitetinin rektoru Elbrus İsayevə və Zəfər Qurbanova, Naxçıvan Muxtar Respublikasının iqtisadiyyat naziri Kazım Hüseynəliyevə, kənd təsərrüfatı naziri Rafail Quliyevə, AMEA-nın həqiqi üzvü, akademik Tariyel Talıbova, eləcə də tərəfdaş qurumların nümayəndələrinə, təşkilat komitəsinə və Naxçıvan Dövlət Universitetinin kollektivinə təşəkkürünü bildirib.

Qeyd edək ki, bu cür elmi platformalar ali təhsil müəssisələri arasında əməkdaşlığın genişləndirilməsi, innovativ tədqiqatların təşviqi və ekoloji problemlərin həlli istiqamətində birgə fəaliyyətin gücləndirilməsi baxımından mühüm əhəmiyyət daşıyır.
Mingəçevir Dövlət Universiteti yaşıl iqtisadiyyatın inkişafı, elmi əməkdaşlığın genişləndirilməsi və dayanıqlı gələcəyin qurulması istiqamətində fəaliyyətini davam etdirir.

.

.

.

.

.

.

.

.

.

.

Dialoq.az