Şəhər təkcə yolları, binaları və parkları ilə deyil, ilk növbədə təmizliyi, sanitariya vəziyyəti və sakinlərin sağlam yaşam mühiti ilə qiymətləndirilir. Təmizlik olan yerdə sağlamlıq, nizam-intizam və inkişaf var. Antisanitariya hökm sürən yerdə isə xəstəlik, laqeydlik və idarəetmədə ciddi boşluqlar özünü göstərir.

Təəssüf hissi ilə qeyd etməliyik ki, son dövrlər Yevlax şəhərinin müxtəlif ərazilərində müşahidə olunan antisanitar vəziyyət ciddi narahatlıq doğurur. Küçələrin müxtəlif hissələrində yaranan zibilliklər, vaxtında daşınmayan məişət tullantıları, binaların zirzəmilərində toplanan çirkab suları, kanalizasiya xətlərinin tez-tez partlaması, həmin suların zirzəmilərə dolması, üfunət iyi, ağcaqanad, milçək və digər həşəratların çoxalması artıq təkcə estetik problem deyil, insanların sağlamlığını təhlükə altına alan ciddi sanitariya problemidir.

Mütəxəssislər dəfələrlə bildiriblər ki, çirkab sularının uzun müddət zirzəmilərdə qalması, tullantıların vaxtında yığışdırılmaması müxtəlif yoluxucu xəstəliklərin yayılması üçün əlverişli şərait yaradır. Belə vəziyyət isə xüsusilə uşaqların, yaşlı insanların və xroniki xəstəliklərdən əziyyət çəkən şəxslərin sağlamlığı üçün ciddi risk hesab olunur.

Ən acınacaqlı məqam isə ondan ibarətdir ki, sanki problemlər yalnız ictimailəşdirildikdən, media tərəfindən işıqlandırıldıqdan, sosial şəbəkələrdə tənqid edildikdən və ictimai qınaq formalaşdıqdan sonra aidiyyəti qurumlar hərəkətə keçməyə başlayırlar. Halbuki dövlət qurumlarının əsas vəzifəsi problemi yaranandan sonra deyil, yaranmamışdan əvvəl qarşısını almaqdır. İdarəetmənin mahiyyəti də məhz bundan ibarətdir.

Şəhər rəhbərliyi və məsul qurumlar elə bir nəzarət sistemi qurmalıdırlar ki, küçələrdə günlərlə qalaqlanmış zibillər yaranmasın, kanalizasiya şəbəkələri mütəmadi yoxlanılsın, qəzalı xətlər vaxtında təmir edilsin, binaların zirzəmilərində çirkab suları yığılmasın, yaşayış məntəqələrində antisanitariya ocaqları formalaşmasın. Problemlərin böyüməsini gözləmək deyil, onların qarşısını almaq əsas fəaliyyət prinsipi olmalıdır.

Şübhəsiz ki, bu məsələlərdə bəzi sakinlərin də məsuliyyətsiz davranışları var. Məişət tullantılarının müəyyən olunmayan yerlərə atılması, ətraf mühitə biganə münasibət problemlərin artmasına səbəb olur. Lakin məsuliyyətin ən böyük hissəsi yenə də şəhər rəhbərliyinin və aidiyyəti xidmət qurumlarının üzərinə düşür. Çünki nəzarəti təşkil edən, qaydaların icrasını təmin edən və şəhərin sanitariya vəziyyətinə cavabdeh olan məhz onlardır. Güclü nəzarət olan yerdə belə mənzərələrin yaranmasına imkan verilməz.
Müasir şəhər idarəçiliyi yalnız yolların çəkilməsi və ya parkların salınması ilə ölçülmür. Ən vacib göstəricilərdən biri şəhərin təmizliyi, kanalizasiya sisteminin saz vəziyyətdə saxlanılması, tullantıların operativ daşınması və sanitariya normalarına ciddi əməl edilməsidir. Elə bir idarəetmə sistemi formalaşdırılmalıdır ki, nə şəhərdə, nə də şəhər ətrafı yaşayış məntəqələrində zibilliklər və antisanitariya ocaqları yaranmasın.

Bu gün susmaq, problemləri gizlətmək və ya görməzlikdən gəlmək çıxış yolu deyil. Əksinə, ictimai nəzarət, media, tənqid və ictimai qınaq sağlam cəmiyyətin inkişafına xidmət edən ən mühüm vasitələrdən biridir. Çünki problemlər dilə gətirildikcə onların həlli istiqamətində real addımlar atılması üçün ictimai təzyiq formalaşır.
Biz bütün aidiyyəti qurumları üzərlərinə düşən vəzifələri vicdanla yerinə yetirməyə, şəhərin sanitariya vəziyyətinə gündəlik nəzarəti gücləndirməyə, sakinləri isə yaşadıqları mühitə daha məsuliyyətlə yanaşmağa çağırırıq.

Unutmayaq ki, hər şey təmizlikdən başlayır. Bir yerdə təmizlik yoxdursa, orada sağlamlıqdan, inkişafdan, yüksək həyat səviyyəsindən və müsbət dəyişikliklərdən danışmaq mümkün deyil. Təmiz şəhər yalnız kommunal xidmətlərin deyil, həm də məsuliyyətli idarəetmənin, ictimai nəzarətin və hər bir vətəndaşın ortaq məsuliyyətinin nəticəsidir.

Dialoq.az