Qax, Zaqatala və Balakən rayonlarında qeyri-sabit hava şəraiti və çaylardan sel keçməsi nəticəsində Qax–Balakən dəmir yolu sahəsində infrastruktura ciddi zərər dəyib.

Dialoq.az xəbər verir ki,bu barədə Azərbaycan Dəmir Yolları məlumat yayıb.Bildirilib ki,təhlükəsizlik tədbirləri çərçivəsində həmin istiqamətdə qatarların hərəkəti müvəqqəti məhdudlaşdırılıb. Bu gündən etibarən iyulun 20-dək Qorağan, Əliabad, Zaqatala, Göyəm və Balakən stansiyalarına bilet satışı dayandırılıb.

Məlumata görə, iyulun 8-dən 20-dək Bakı–Balakən qatarları Qax stansiyasına qədər hərəkət edəcək. Balakən–Bakı istiqamətində hərəkət edən qatarlar isə Qax stansiyasından yola düşəcək.

Sərnişinlərin rahatlığının təmin olunması məqsədilə digər stansiyalardan Qax stansiyasına və əks istiqamətdə ödənişsiz avtobuslarla daşınma təşkil ediləcək.

Hazırda dəymiş ziyanın aradan qaldırılması və dəmir yolu infrastrukturunun bərpası istiqamətində işlər davam etdirilir.

Dialoq.az