Cənab Prezidentin qurub yaratdıqlarını dağıtmaq yox, onu göz bəbəyi kimi qorumaq lazımdır. Bunu "Dialoq.az" saytına yazıçı, Azərbaycan Yazıçılar və Azərbaycan Jurnalistlər Birliyinin üzvü Natiq Əlisoy Yevlax rayon Kür çayı sahilində yaradılmış bulvar istirahət məkanı haqqında danışarkən bildirib:

"Qeyd etməliyəm ki, bir neçə il öncə Yevlax rayonu Kür çayı sahilində yaradılmış bulvar istirahət məkanının açılışını Müzəffər Ali Baş Komandan, cənab İlham Əliyev edib. Bununla bağlı tarixi faktlar da var.

Kür çayı sahilində yaradılmış bulvar istirahət məkanının açılışı zamanı orada yaradılmış şərait ən yüksək səviyyədə olub, ora böyük məbləğdə vəsaitlə bərabər böyük zəhmət sərf edilib. Sözügedən bulvar yaradılıb ki, Yevlax sakinlərinin mədəni istirahəti təmin edilsin. Bu cənab Prezident İlham Əliyevin yevlaxlılara olan diqqət və qayğısının bariz nümunəsidir. Təəssüflər olsun ki, bu gün illər öncə yaradılmış bulvar diqqətdən kənar qalıb. Maraqlısı da odur ki, heç bir aidiyyatı qurum bu haqda düşünmək istəmir. Yenə də həmişəki kimi kimlərsə gözləyir ki, biz danışaq, yazaq ondan sonra nəsə etsinlər. Düşünürəm ki, cənab Prezidentin imzası və iştirakı ilə açılan məkana qarşı laqeyd münasibət göstərmək birbaşa cənab Prezidentə qarşı və onun regionlarla bağlı apardığı uğurlu sosial-iqtisadi siyasətə qarşı hörmətsizlik və diqqətsizlikdir. Düşünürəm ki, bu kimi hallardan danışmaq və bu kimi halları işıqlandırmaq üçün hər hansı vəzifə danışmaq lazım deyil, sadəcə gözüaçıq olmaq lazımdır. Biz də istəyirik ki, başqa rayon və şəhərlərdə olduğu kimi Yevlaxda da yevlaxlılar onlar üçün yaradılmış istirahət məkanlarından faydalansın və insanlar mədəni istirahət edə bilsin. Kür çayı sahilində yaradılmış bulvar istirahət məkanı Yevlaxın ən gözəl məkanlarından biri olmaqla yanaşı, eyni zamanda Yevlaxın giriş qapısıdır. Odur ki, cənab Prezidentin qurub yaratdıqlarını dağıtmaq yox, onu göz bəbəyi kimi qorumaq və daha da inkişaf etdirmək lazımdır,-Deyə Natiq Əlisoy bildirib".


Dialoq.az