Yevlax 1 saylı Mediasiya Təşkilatının direktoru Nigar Hüseynzadə 1 ildən çox davam edən məhkəmə prosesindən sonra bəraət alıb.

Dialoq.az xəbər verir ki,bu barədə Yevlax 1 saylı Mediasiya Təşkilatının direktoru Nigar Hüseynzadə özünün Facebook sosial şəbəkə hesabında paylaşım edib.

Nigar Hüseynzadənin sözlərinə görə, 14 iyul 2026-cı il tarixində Azərbaycan Respublikasının Ali Məhkəməsi onun barəsində bəraət hökmü çıxarıb və bununla da 1 il 1 ay 21 gün davam edən hüquqi mübarizə yekunlaşıb.

Bildirilib ki, cinayət işi Bakı 13 saylı Mediasiya Təşkilatının direktoru İlham Mehtiyevin xüsusi ittiham qaydasında müraciəti əsasında Azərbaycan Respublikası Cinayət Məcəlləsinin müvafiq maddələri ilə başlanıb.

İşə ilkin olaraq Ağdam Rayon Məhkəməsində Mahir Niftəliyev sədirliyi ilə baxılıb. Məhkəmə prosesində Nigar Hüseynzadə tərəfindən Azərbaycan Respublikası Ədliyyə Nazirliyinin ekspertiza rəyi, Mediasiya Şurasının İntizam Komissiyasının mediator Pəri Əhmədova ilə bağlı qərarı və digər sübutlar təqdim edilib.

Lakin birinci instansiya məhkəməsinin qərarı ilə razılaşmayan Nigar Hüseynzadə qanunvericiliyin verdiyi hüquqdan istifadə edərək apellyasiya şikayəti verib.

Daha sonra işə Gəncə Apellyasiya Məhkəməsində hakim Sevindik Əzizovun sədrliyi ilə baxılıb. Apellyasiya instansiyasında da tərəflər öz hüquqi mövqelərini və təqdim etdikləri sübutları müdafiə ediblər.

Son olaraq Azərbaycan Respublikasının Ali Məhkəməsi işə hüquqi qiymət verərək əvvəlki məhkəmə qərarlarını ləğv edib və Nigar Hüseynzadə barəsində bəraət qərarı qəbul edib.

Nigar Hüseynzadə bildirib ki, bu qərar onun üçün yalnız hüquqi qələbə deyil, həm də ədalətin bərpasıdır.

O, yaşadığı müddətdə keçirdiyi mənəvi gərginliyə diqqət çəkərək bildirib ki, günahsız olduğu halda uzun müddət davam edən məhkəmə prosesi onun üçün ağır sınaq olub.

Nigar Hüseynzadə hüquqi mübarizəsində ona dəstək göstərən vəkilləri Sevda Məhərrəmova və İkram Abdullayevə təşəkkür edib.

Qeyd edək ki, Ali Məhkəmənin bəraət qərarı ilə Nigar Hüseynzadə barəsində başlanmış cinayət işi üzrə uzunmüddətli məhkəmə prosesi başa çatıb.

Dialoq.az