İsrailin Baş naziri Benyamin Netanyahu Müdafiə Ordusuna (IDF) İranla hərbi əməliyyatların bərpası da daxil olmaqla, hər hansı bir ssenariyə hazır olmaq barədə tapşırıq verib.

“Dialoq.az ” “The Times of Israel”ə istinadla xəbər verir ki, bu barədə İsrailin siyasi dairələrindəki mənbə məlumat yayıb.

Mənbənin sözlərinə görə, Baş nazir ordunun lazım gələrsə, dərhal döyüş meydanına qayıtmalı olduğunu vurğulayıb.

IDF-in Baş Qərargah rəisi, general-leytenant Eyal Zamir də İsrail hərbçilərinin İrana qarşı genişmiqyaslı əməliyyatları bərpa etməyə hazır olduğunu təsdiqləyib.

O bildirib ki, ordunun əlində İslam Respublikasının ərazisində vurulacaq əlavə hədəflərin siyahısı var:

“Ordu yüksək hazırlıq vəziyyətindədir. Əməliyyatın mümkün bərpası əldə edilmiş nəticələri daha da inkişaf etdirməyə və Tehranyönlü qüvvələri daha da zəiflətməyə imkan verəcək”.

CNN telekanalı isə öz mənbələrinə istinadən qeyd edir ki, hazırda İsrail rəsmiləri ABŞ ilə İrana qarşı yeni zərbələrin endirilməsi imkanlarını müzakirə edir. Məlumata görə, İsrail tərəfi İranın enerji infrastrukturu obyektlərinə və rəsmi şəxslərinə qarşı planlaşdırılan hücumlar çərçivəsində öz addımlarını Vaşinqtonla koordinasiya edir.

Xatırladaq ki, bir müddət əvvəl İsrail ABŞ-dən yeni qırıcı eskadrilyaların alınmasını təsdiqləyib ki, bu da regionda hərbi gərginliyin yeni mərhələyə keçdiyini göstərir.
Dialoq.az