Millət Vəkili İlham Məmmədov Azərbaycanın konstruktiv mövqeyi ilə bağlı Dialoq.az xəbər saytına açıqlama verib:

Bildiyimiz kimi Azərbaycan İkinci Qarabağ müharibəsində parlaq Qələbə əldə etdikdən sonra imzalanmış 10 noyabr bəyannaməsinin müddəalarına uyğun olaraq Ermənistan Silahlı Qüvvələri Qarabağ ərazisindən çıxarılmalı və bu əraziyə müvəqqəti olaraq rus sülhməramlı qüvvələri yerləşdirilməli idi. Bununla yanaşı Azərbaycan Qarabağda yaşayan ermənilərin Ermənistanla gediş-gəlişini asanlaşdırmaq məqsədilə Laçın rayonu ərazisindən keçməklə Ermənistana yeni yolun çəkilişini həyata keçirməli idi. Azərbaycan bu öhdəliyi tez bir zamanda yerinə yetirdi. Baxmayaraq ki, burada müddət 3 ilə qədər göstərilmişdi. Azərbaycan tərəfi təxminən ilyarıma bu öhdəliyi yerinə yetirdi və beləliklə, Qarabağda yaşayan ermənilərin Laçın yolundan keçərək Ermənistana gediş-gəlişi asanlaşdı. Amma sonrakı tarixlərdə biz görürdük ki, ermənilər Qarabağda yaşayan ermənilərin gediş-gəlişini asanlaşdırmaq məqsədilə yaradılan yoldan digər məqsədlərlə istifadə edirlər. Yəni Ermənistanda silahlı birləşmələrin və minaların bu yol vasitəsilə Qarabağa daşınması həyata keçirilir. Məhz bu problemləri və ərazisində yaranmış qanun pozuntularına əsaslanaraq Azərbaycan tərəfi də müvafiq tədbirlər həyata keçirdi. Belə ki, Ermənistan tərəfindən aprelin 22-də birtərəfli qaydada Azərbaycan ilə sərhəddə Laçın-Xankəndi yolunun girişində nəzarət buraxılış məntəqəsinin qurulmasına adekvat olaraq aprelin 23-ü saat 12:00-da Azərbaycan Respublikası Dövlət Sərhəd Xidmətinin bölmələri tərəfindən ölkəmizin suveren ərazilərində, Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulub. Bu məntəqə regiondakı qanunları tənzimləyir, pozuntuların qarşısını alır və eyni zamanda sülhə böyük töhfə verir. Məhz qeyd edilənlərə əsasən bir faktı vurğulamaq lazımdır ki, Laçın sərhəd-buraxılış məntəqəsinin qurulması ölkəmizə və xalqımıza qarşı hərbi cinayətlər törətmiş şəxslərin müəyyən edilib saxlanması baxımından da mühüm əhəmiyyət kəsb edir. Çünki 1990-cı illərin əvvəlində azərbaycanlılara qarşı XX əsrin ağır faciəsini törətmiş Vaqif Xaçatryan adlı şəxsin saxlanılması da bunun əyani nümunəsidir.
Azərbaycan öz ərazisində hər hansısa tədbiri həyata keçirirsə bu erməniləri və onların riyakar havadarlarını narahat etməməlidir. Çünki biz öz doğma torpaqlarımızda istdəyimiz tədbirləri həyata keçirə bilərik. Azərbaycan sülhə çağırış edən və töhfə verən qüdrətli dövlətdir. Bizim ərazi bütövlüyümüzə və hüquqlarımıza hər kəs hörmət etməlidir. Mövqeyimiz konstruktiv, addımlarımız isə haqq-ədalətə uyğundur,-Deyə İlham Məmmədov vurğulayıb.

Dialoq.az