Millət Vəkili İlham Məmmədov Azərbaycan hökuməti tərəfindən Xankəndində yaşayan ermənilərə göndərilən qırx ton un yardımı ilə bağlı Dialoq.az xəbər saytına fikirlərini bildirib:

Aylardı "humanitar böhran", "aclıq" adı altında dünyaya hay çəkən "hay"lar görsünlər və şahidi olsunlar ki, biz Azərbaycanlılar nə "yolkəsən", nə də "çörəkkəsən" millət deyilik. Biz salamı verəndə kişi kimi, vuruşanda isə haqq-ədalət və qanunla vuruşuruq. Biz, bizləri özünə dost seçənlər üçün əvəzolunmaz dost, düşmən seçənlər üçün ən güclü düşmənik. Bizim ulu babalarımızdan çörəklə və el yolu ilə bağlı bizə miras qalan bir neçə adət və ənənələr var. Biz qanunsuz olaraq nə heç kimin yolunu kəsmişik, nə də çörəyini. Odur ki, Ermənistan tərəfi bir daha anlamalı və başa düşməlidir ki, düşdükləri çətin vəziyyətə görə məsuliyyət Azərbaycan tərəfinin yox, Ermənistanın hərbi-siyasi rəhbərliyinin üzərinə düşür. Onlar anlamalıdırlar ki, güclü Azərbaycanla ultimatım, hədə-qorxu, terror, şər-böhtan dili ilə danışmaq olmaz. Cənab Prezident, Müzəffər Ali Baş Komandan İlham Əliyevin də hər dəfə dediyi kimi əgər ermənilər Azərbaycan vətəndaşlığını qəbul edib, Azərbaycan qanunları ilə yaşasalar onların güzəranı indiki vəziyyətlərindən qat-qat yüksək olacaqdır. Bu gün bizim Xankəndində yaşayan ermənilərə qırx ton un göndərməyimiz bir daha onu sübut edir ki, ermənilərdən fərqli olaraq biz insanpərvər, sülhsevər və müstəqil dövlətik, biz heç kimdən asılı deyilik,-Deyə İlham Məmmədov vurğulayıb.


Dialoq.Az