Bu gün qürurla və inamla deyə bilərik ki, Hərbi Prokurorluq ölkəmizə qarşı yönəlmiş bütün növ hərbi cinayətləri davamlı, sistemli və peşəkar şəkildə nəzarətdə saxlayır və buna qarşı zəruri tədbirlər görür.

Buna sübut olaraq qeyd edə bilərəm ki, son illərdə Hərbi Prokurorluq tərəfindən bir çox uğurlu əməliyyatlar keçirilib və keçirilən əməliyyatlar nəticəsində onlarla cinayətkar dəstə ifşa edilərək qanuna müvafiq qaydada məsuliyyətə cəlb edilib. Xüsusilə qeyd edə bilərəm ki, bu istiqamətdə aparılan uğurlu əməliyyatlar içərisində vaxtilə Qarabağda vuruşmuş separatçı erməni terrorçularına qarşı həyata keçirilən əməliyyatlar bu gün bizi həm sevindirir, həm də qürurlandırır. Belə ki, bir vaxtlar vətəndaşlarımıza qarşı soyqırım və terror əməliyyatları yerinə yetirən erməni cinayətkarları elə düşünürdülər ki, onların etdikləri insanlığa sığmayan cinayətlər üstüörtülü qalacaq və onlar ifşa olunmayacaqlar. Ancaq, bu mümkün deyil. Çünki, Azərbaycan hökuməti öz təhlükəsizliyini daxildən və xaricdən etibarlı qoruyur və buna qarşı davamlı mübarizə aparır. Heç bir cinayətkar dəstə, terror qruplaşması Azərbaycanın təhlükəsizliyinə qarşı təxribata cəhd edə bilməz. Buna əyani misal olaraq deyə bilərik ki, 1991-ci il 3 dekabr tarixində Xocalı rayonunun Meşəli kəndində erməni hərbi birləşmələri tərəfindən törədilmiş qətliamın iştirakçısı və təşkilatçılarından biri olan "Vaqif Xaçaturyan " adlı erməni terrorçusu bu gün hüquq mühafizə orqanlarımız tərəfindən Laçın sərhəd-buraxılış məntəqəsindən keçməyə cəhd edərkən hərbi cinayətkar kimi yaxalanmış və məsuliyyətə cəlb edilmişdir. Odur ki, istər dünən, istərsə də bu gün bu və bu kimi ölkəmizə və onun vətəndaşlarına, ərazi bütövlüyünə, suverenliyinə qarşı yönəlmiş cinayətlər və cinayətkarlar ifşa edilərək məsuliyyətə cəlb ediləcəkdir. Buna heç kimin şübhəsi olmamalıdır,-Deyə İlham Məmmədov vurğulayıb.

Dialoq.Az