AZƏRTAC-a istinadən "Dialoq.Az" xəbər verir ki, Milli Məclisin deputatı İlham Məmmədov BMT Təhlükəsizlik Şurasının növbədənkənar iclası ilə bağlı fikirlərini bildirib:

Nizamnaməsinə görə beynəlxalq sülhün və təhlükəsizliyin qorunmasında özünü ali orqan hesab edən BMT Təhlükəsizlik Şurası (TŞ) təsis olunduğu 1945-ci ildən bu günə qədər dünyada sülhün və əmin-amanlığın yaradılması kimi böyük məsuliyyəti öz üzərinə götürüb. Əsas vəzifəsi beynəlxalq sülhü və təhlükəsizliyi qorumaq və möhkəmləndirmək, dövlətlər arasında əməkdaşlığı inkişaf etdirmək olan BMT bu gün nədənsə özünü ali orqan yox, ali ədalətsiz təşkilat kimi göstərməyə çalışır. Belə ki, qurum dünən Ermənistanın guya Qarabağda “humanitar böhran”, aclıq, blokada və s. şəraitində yaşamasını əsas götürüb növbədənkənar iclas keçirdi. Bununla BMT Təhlükəsizlik Şurası bir daha sübut etdi ki, vaxtilə erməni silahlı birləşmələrinin tam, qeyri-şərtsiz və dərhal Azərbaycan ərazilərindən çıxarılması üçün qəbul etdiyi 822, 853, 874 və 884 saylı qətnamələrin hər biri formaldır. Çünki bu qətnamələri Azərbaycan Ordusu öz gücünə yerinə yetirdi.

Bu fikirləri AZƏRTAC-a açıqlamasında Milli Məclisin deputatı İlham Məmmədov söyləyib.
“Azərbaycan hökuməti otuz ilə yaxındır bütün dünyaya, o cümlədən BMT Təhlükəsizlik Şurasına sübut və izah etməyə çalışırdı ki, biz işğala məruz qalmışıq, tarixi və dədə-baba torpaqlarımız düşmən tapdağı altındadır, məscidlərimizdə düşmən donuz saxlayır. Eyni zamanda, bizə qarşı dünyada görünməyən vəhşiliklər olub. Bəs o zaman dünyada böyük hərflərlə özünü sülhün və təhlükəsizliyin qarantı hesab edən BMT harada idi? Deməli, doğrudan da Prezident, Müzəffər Ali Baş Komandan İlham Əliyevin dediyi "Əfsuslar olsun ki, dünyada beynəlxalq hüquq işləmir" ifadəsi öz təsdiqini tapıb. Əgər həqiqətən də dünyada beynəlxalq hüquq işləsəydi, BMT Təhlükəsizlik Şurası 1993-cü il aprelin 30-da Kəlbəcərin işğalından sonra 822 saylı, 1993-cü il iyulun 29-da Ağdamın işğalından sonra 853 saylı, 1993-cü il oktyabrın 14-də Füzuli, Cəbrayıl, Qubadlı rayonlarının işğalından sonra 874 saylı, 1993-cü il noyabrın 12-də Zəngilan və digər Azərbaycan rayonlarının işğal olunmasından sonra 884 saylı qəbul etdiyi qətnamələri dərhal yerinə yetirərdi. İndi necə olur ki, bu gün BMT Təhlükəsizlik Şurası erməni bayrağı altında "göz yaşlarına boğulub". Bu gün Qarabağdakı ermənilər “humanitar böhran” içində yaşayırlar, yaxud da Laçın dövlət sərhədindən buraxılış məntəqəsi onların üzünə bağlanıb kimi ifadələrə artıq heç kim inanmır”, - deyə deputat bildirib.

O əlavə edib ki, torpaqlarımızı işğal altında saxlayan Ermənistan və onun vətəndaşları otuz il ərzində Qarabağ ərazisində qanunsuzluqlarla məşğul olublar. Onlar bu gün də elə başa düşürlər ki, bu qanunsuz əməllərinə davam edərək, nə istəsələr edə bilərlər. Ancaq anlamırlar ki, Azərbaycan müstəqil, suveren dövlətdir, öz sərhədlərini, dövlət təhlükəsizliyini tam şəkildə müdafiə edir.

İ.Məmmədov deyib: “Laçın dövlət sərhədindən buraxılış məntəqəsinin yaradılması Azərbaycanın erməniləri blokadada saxladığı anlamına gəlmir. Yox, bu əsla belə deyil, biz sadəcə öz qanunlarımız daxilində ölkəmizə gələn vətəndaşları, daşınan yükləri və s. yoxlamalıyıq və öz qanunlarımız daxilində buna imkanlar yaratmalıyıq. Odur ki, Azərbaycanın qanunlarına tabe olan Qarabağda yaşayan ermənilər Laçın postundan rahatlıqla keçə və bu imkanlardan istifadə edə bilərlər. Hesab edirəm ki, dünən BMT Təhlükəsizlik Şurasının keçirdiyi iclas əsassız və sifarişlidir. Eyni zamanda, iclas növbəti erməni yalanının təzahürü kimi dünyada beynəlxalq hüququn olmaması deməkdir və Azərbaycana qarşı yönəlmiş növbəti təxribatdır. Biz öz hüquqlarımızı və haqlarımızı bilirik, eyni zamanda, ölkəmizə qarşı yönəlmiş təxribatların da qarşısı uğurla alınır”.

Dialoq.Az