Naxçıvan Muxtar Respublikasında fəaliyyət göstərən qeyri-hökumət təşkilatlarının beynəlxalq ictimaiyyətə müraciəti ilə bağlı "Dialoq.Az" saytına müsahibə verən Milli Məclisin deputatı İlham Məmmədov bildirib ki, bütün dünya ictimaiyyətinin gözü qarşısında otuz ildən çoxdur ki, Naxçıvan Muxtar Respublikası blokada şəraitindədir. İllərdi ki, dünya ictimaiyyəti Naxçıvan Muxtar Respublikasının blokada şəraitində yaşamasına heç bir münasibət bildirmir. Ancaq, bu gün Azərbaycanın işğaldan azad olunmuş ərazilərində blokada şəraitində olmayan ermənilərin guya ki, blokadada olması və humanitar böhran içində yaşamaları barədə yazılar tirajlanır. Əlbəttə ki, bu əsassız iddiadır. Dünya ictimaiyyəti, bəzi ermənipərəst qüvvələr blokadanın nə olduğunu görmək və bilmək istəyirsə gəlib Naxçıvanla yaxından tanış olsunlar. Əlbəttə ki, Naxçıvan Muxtar Respublikasında fəaliyyət göstərən qeyri-hökumət təşkilatlarının beynəlxalq ictimaiyyətə müraciəti tam haqlı və hüquqi əsaslıdır. Naxçıvan Muxtar Respublikası Azərbaycanın ayrılmaz tərkib hissəsidir və Naxçıvanı mərkəz Bakı ilə birbaşa bağlayan quru yol və dəhliz olmalıdır. Bu bizim hüququmuzdur. Ermənistan birinci növbədə "Zəngəzur dəhlizi"nin açılması üçün Azərbaycan tərəfi ilə razılığa gəlməlidir, sonra Laçın dəhlizindən, Laçın sərhəd-buraxılış məntəqəsinin açılmasından danışmalıdır,-Deyə İlham Məmmədov bildirib.

Dialoq.Az