Torpaqlarımızın azadlığı uğrunda canlarını fəda etmiş şəhidlərimizin,  qazilərimizin, qəhrəman oğullarımızın haqqını heçnə ilə qaytarmaq mümkün deyil. Onlar bizim qürur yerimiz və tarixi qəhrəmanlarımızdır. Onlar bizlər üçün canlarından keçdilər, əllərində silah haqq savaşında qeyrət, namus uğrunda vuruşdular. Bu gün bizim hər birimizin müqəddəs borcudur ki, onların qayğısına qalaq, onlara maddi, mənəvi dəstək olaq. 44 günlük savaşda sinələrini düşmənə sipər edən igid oğullar imkan vermədilər ki, mənfur düşmən bir addım irəli gəlsin. Axı biz bunları gözlərimizlə gördük, axı biz bu qanlı tarixi yaşadıq... O günlərdə hər kəs bir səslə var olsun ordumuz, var olsun igidlərimiz deyirdi. Bəli, danılmaz faktdır ki, o oğullar savaşa gedəndə düşünmürdülər ki, savaş bitdikdən sonra onlara kimsə sağol deyəcək, kimsə onlara pul, avtomobil, mənzil və s. verəcək. Onlar yalnız və yalnız düşünürdülər ki, 30 ilə yaxın düşmən taptağı altında qalan tarixi torpaqlarımızı, milli qürurumuzu qaytarmalıyıq. Dedilər və kişi kimi də dediklərini etdilər! İndi növbə bizimdir, indi bizim onlara təmənnasız xidmət etməyimizin zamanıdır. Bu yolda biz bir və səfərbər olmalı, eyni zamanda əməli addımlar atmalıyıq.

YYSİB Şəhidlərin Ailə Üzvləri, Qazilər və Yaradıcı Hərbçilərlə İş Departamentinin sədri Natiq Əlisoy