“Nyukasl” UEFA Çempionlar Liqası pley-off mərhələsinin ilk oyunu çərçivəsində sabah Bakıda “Qarabağ”ın qonağı olacaq.

Dialoq.az Qafqazinfo-ya istinadən xəbər
verir ki,İngiltərə təmsilçisinin baş məşqçisi Eddi Hau matçdan öncə keçirilən mətbuat konfransında iştirak edib.

48 yaşlı mütəxəssis oyunla bağlı fikirlərini bölüşüb:

“Hazırda heyətlə bağlı ciddi problemlərimiz yoxdur. Oyunçularımız yerindədir. Bakıya gözəl əhvalda gəlmişik. Son oyunlarda yaxşı nəticələr qazanırıq. “Qarabağ”ı ciddi şəkildə araşdırmışıq. Onların “Çelsi” və “Liverpul”la oyunlarını təhlil etmişik. “Qarabağ” yaxşı oyun göstərir, texnikalı futbolçuları var. Maraqlı qarşılaşma olacaq. “Çelsi” ilə matç hər iki komanda üçün çətin idi. “Qarabağ”ın səviyyəsi ilə bağlı müəyyən məlumatlar aldıq.

İngilis mütəxəssis həmçinin şanslarından istifadə edəcəklərini də vurğulayıb:

“İrəli getmək istəyirik. Şansımızdan yaxşı istifadə etməyə çalışacağıq. Tarixi şansımız var, pley-offdayıq. Uzaq yoldan gəlmişik, azarkeşlərimiz də artıq buradadır. Burdan pozitiv şəkildə ayrılmaq istəyirik. Çətin oyunlarımız var. Təqvimi nəzərə almışıq. Əlimizdən gələni edəcəyik ki, hər şeyi tənzimləyək. Hədəflərimiz var, arzularımız böyükdür. Özümüzə inanırıq”.

Bundan əlavə, o, Qurban Qurbanovla bağlı da söz açıb:

“Açığı, Qurban Qurbanovla bağlı ciddi araşdırmam olmayıb. Bir komandada bu qədər uzun müddət qalırsansa, hörmətə layiqsən. Komandanı motivasiya etməsi, əlaqələri təqdir ediləcəkdir. Çempionlar Liqasında yaxşı nəticə göstəriblər. Özlərinə məxsus oyun üslubları var. Oyunlarına baxmaq maraq doğurur. Ona görə “Qarabağ”a qarşı oyun asan olmayacaq”.
Dialoq.az