"Dialoq.az" xəbər verir ki, 08.05.2022-ci il tarixdə Balakən rayonunda region üzrə növbəti güləş çempionatı keçirilib, çempionatda 2007-2009-cu il təvəllüdlü gənc idmançılar növbəti dəfə güclərini sınayıblar. Qeyd edək ki, keçirilən çempionatda 68 kq üzrə ali kürsüyə Mədətli Eşqin Şahin oğlu layiq görülüb.
"Sağlam bədəndə sağlam ruh olar" deyirlər. Ümummilli liderimiz, ulu öndər Heydər Əliyevin sağlam ruhlu, milli düşüncəli, vətənini, bayrağını sevən gənclərə inamı hər zaman böyük olub. O, deyirdi:
“Bizim bu günkü gəncliyimiz sağlam düşüncəli gənclikdir, vətənpərvər gənclikdir, xalqını, millətini sevən gənclikdir… Gənclərimiz mükəmməl təhsil almalı, həyatı dərindən öyrənməli, dünyada gedən prosesləri bilməlidir. Lazımi fəaliyyət göstərib öz xalqına, dövlətinə xidmət etməlidir.”
Dünyanın harasında yaşamasından asılı olmayaraq Azərbaycan deyib üçrəngli, ay-ulduzlu şanlı bayrağımızı zirvələrə qaldıran hər bir Azərbaycan övladı hər birimiz üçün fəxr və qürur mənbəyidir.
Bu gün sizlərə haqqında bəhs etdiyim belə gənclərdən biri də Mədətli Eşqin Şahin oğludur. Mədətli Eşqin Şahin oğlu uzun müddət Ukrayna Respublikasında yaşayıb, orada seçilən güləşçi kimi tanınıb, onlarla medal və mükafatlara layiq görülüb, bu gün isə doğma vətəni Azərbaycanda öz peşəkar idman karyerasını davam etdirir. Yolun uğurlu, başın uca olsun, Eşqin bala! Qolundan güc, qəlbindən Vətən sevgisi, üzündən sevinc əskik olmasın! Vətənin gələcəyi, xalqımızın ağır tale yükü sizlərə əmanətdir!
_____________________________________________
Natiq Əlisoy, yazıçı, şair, Azərbaycan Jurnalistlər Birliyinin üzvü, "Qızıl qələm", "Ulu öndər" media mükafatı laureatı.