2026-cı il aprelin 5-də Yevlax dəmir yolu stansiyası ərazisində baş verən hadisə zamanı yüksək gərginlikli elektrik cərəyanının təsirinə məruz qalan yeniyetmə uzun sürən müalicədən sonra artıq evə qayıdıb.

Dialoq.az xəbər verir ki,Yevlax şəhərinin Aeroport qəsəbə sakini, 2010-cu il təvəllüdlü Quluzadə Ramin Rövşən oğlu dəmir yolu ərazisində vaqonların birləşən hissəsində yerləşən pilləkənlə keçərkən yüksək gərginlikli elektrik xəttinin təsirinə məruz qalmışdı.

Hadisədən dərhal sonra yeniyetmə Yevlax Rayon Mərkəzi Xəstəxanasına çatdırılmış, ona ilkin tibbi yardım göstərilmişdi. Daha sonra vəziyyəti ağır qiymətləndirildiyi üçün Bakı şəhərində yerləşən Nərimanov Tibb Mərkəzinin nəzdində fəaliyyət göstərən Yanıq Mərkəzinə təxliyə olunmuşdu.

Uzun müddət davam edən müalicə prosesindən sonra Ramin artıq evə buraxılıb. Hazırda o, ev şəraitində müalicəsini davam etdirir.

Ailə üzvlərinin sözlərinə görə, hadisədən sonra yeniyetmənin sağlamlığı üçün ciddi mübarizə aparılıb. Həkimlərin müdaxiləsi və aparılan müalicələr nəticəsində onun vəziyyətində müsbət irəliləyiş əldə olunub.

Hazırda səhhəti əvvəlki dövrlə müqayisədə daha yaxşı qiymətləndirilən Ramin gündəlik həyatına uyğunlaşmağa çalışır.
Ətraflı sujetdə:

Dialoq.az