Ağdaş rayonunun Eymur kəndində yaşayış evlərini elektrik enerjisi ilə təmin edən dirəklər qəzalı vəziyyətdədir.

Dialoq.az xəbər verir ki,Ağdaş rayonunun Eymur kəndində yaşayış evlərini elektrik enerjisi ilə təmin edən dirəklərin qəzalı vəziyyətə düşdüyü bildirilir. Redaksiyamıza daxil olan müraciətdə qeyd olunur ki, elektrik xəttini daşıyan köhnə taxta şalban dirəklər uzun illərdir yenilənmədiyindən ciddi şəkildə aşınıb, bəzi hissələri çatlayaraq təhlükəli vəziyyət alıb.

Əraziyə baxış zamanı dirəklərin bir qisminin çürüdüyü və artıq istifadəyə yararsız hala düşdüyü müşahidə olunub. Bildirilir ki, xüsusilə küləkli hava şəraitində həmin dirəklərin aşma ehtimalı ciddi narahatlıq yaradır.

Diqqət çəkən digər məqamlardan biri isə elektrik sayğaclarının akasiya ağacından hazırlanmış dirəklərin üzərində quraşdırılmasıdır. Qeyd olunur ki, dirəklərin aşması və ya qırılması halında həm elektrik xəttinə, həm də sayğaclara ziyan dəyə bilər ki, bu da əlavə təhlükə riski yaradır.

Məsələ ilə bağlı aidiyyəti qurumlara dəfələrlə müraciət olunsa da, indiyədək problem aradan qaldırılmayıb.

Sakinlər aidiyyəti qurumlardan əraziyə baxış keçirilməsini, qəzalı vəziyyətdə olan dirəklərin yenilənməsini və mümkün təhlükənin qarşısının alınmasını xahiş edirlər.
Ətraflı sujetdə:

Dialoq.az