Goranboy rayonunun Faxralı kəndində baş verən ağır ailə münaqişəsi faciə ilə nəticələnib.

Dialoq.az xəbər verir ki,ilkin məlumata görə, 1987-ci il təvəllüdlü Emin Vəliyev yaşadığı evdə ailə münaqişəsi zamanı anası – 1963-cü il təvəllüdlü Zoya Əhmədovanı bıçaqlayaraq qətlə yetirib. Hadisə zamanı onun həyat yoldaşı – 1995-ci il təvəllüdlü Jalə Yolçuyeva da bıçaqlanaraq müxtəlif dərəcəli xəsarətlər alıb.

Yaralı qadın yanvarın 31-də səhər saat 05:30 radələrində Gəncə şəhərində yerləşən, Gəncə Şəhər Birləşmiş Xəstəxanasının nəzdində olan Akademik Z.Məmmədov adına xəstəxanaya hospitalizasiya olunub. Ona baş, döş qəfəsi və kürək nahiyəsinin açıq yaraları diaqnozu qoyulub. Zəruri tibbi yardım göstərilib, vəziyyəti orta ağır qiymətləndirilir. Müalicəsi müvafiq şöbədə davam etdirilir.

Məlumata görə, hadisəni törətməkdə şübhəli bilinən Emin Vəliyev hadisə yerindən qaçsa da, polis əməkdaşlarının keçirdiyi əməliyyat-axtarış tədbirləri nəticəsində saxlanılıb.

Bildirilir ki, şübhəli şəxs Vətən müharibəsi qazisi, III qrup əlildir və psixoloji problemlərinin olduğu iddia olunur. Onun iki azyaşlı övladının olduğu da qeyd edilir.

Faktla bağlı Goranboy Rayon Prokurorluğu tərəfindən araşdırma aparılır.
Dialoq.az