Şəhid Musayev Murad Polad oğlu 01.10.2001-ci ildə Bərdə rayonunda anadan olub. O, 2008-2019-cu illərdə orta təhsil alıb. 2016-cı ildə Ağdam "UGM" idman mərkəzinin açıq birinciliyində 2-ci, daha sonra isə 3-cü yerin qalibi olub. 2018-ci ildə "Qarabağ" gününə həsr edilmiş kikboksinq üzrə açıq Bərdə birinciliyində 52-kq çəkidə 2- ci yeri tutub. 10.01.2019-cu ildə vətənə borcunu vermək üçün hərbi xidmətə çağırılıb. 2020-ci il 29 sentyabr tarixində Musayev Murad Polad oğlu "Vətən müharibəsi"ndə döyüşlər zamanı qəhrəmancasına şəhid olub. Şəadətin mübarək şəhidim... Məlumat üçün bildiririk ki, şəhidin atası Musayev Polad Məhəmməd oğlu "Birinci Qarabağ müharibəsi"nin iştirakçısı olub. O, Füzuli rayonu uğurunda gedən döyüşlərdə fəal iştirak edib və Birinci Qarabağ müharibəsi qazisidir. Atası qazi, oğlu şəhid. Şəhid Musayev Murad Polad oğlunun ata babası isə 1948-ci ildə Qərbi Azərbaycanın Dərələyəz mahalından Bərdə rayonunun Əmirli kəndinə məcburi deportasiya olunub. Allahdan şəhidlərimizə rəhmət, qazilərimizə can sağlığı arzulayırıq.
Natiq Əlisoy