Avstriya hökuməti Adolf Hitlerin Braunau am İnn şəhərində anadan olduğu evi polis bölməsinə çevirməyi planlaşdırır.

“Dialoq.az ”Qafqazinfo-ya istinadən xəbər
verir ki,qərarın əsas məqsədi ifrat sağçı qrupların binanı ziyarətgah və simvolik mərkəzə çevirməsinin qarşısını almaqdır.

Avstriya Daxili İşlər Nazirliyi bildirib ki, polisin binaya köçməsi 2026-cı ilin ikinci rübündə reallaşacaq. Qeyd edilib ki, bina uzun müddət baxımsız qaldığı üçün 2016-cı ildə milliləşdirilib.

Şəhər sakini Sibille Trayblmayer qərarı “iki tərəfli qılınc” adlandıraraq, bunun sağçı qrupların binanı simvolik məqsəd üçün istifadə etməsinin qarşısını ala biləcəyini, lakin tikilinin fərqli mənada qiymətləndirilə biləcəyini deyib.

Evin qarşısındakı xatirə daşında “Sülh, Azadlıq və Demokratiya uğrunda. Bir daha faşizm olmaz. Milyonlarla ölü xəbərdarlıq edir” yazısı yer alır.

Avstriyada Holokost qurbanlarını təmsil edən yazıçı və Mauthauzen Komitəsinin üzvü Lüdviq Laher polis bölməsinin problemli ola biləcəyini qeyd edib. Onun fikrincə, sülh və barışıq mərkəzi ideyası daha geniş dəstək alıb. Mağaza sahibi Yasmin Stadler isə evi tarixi kontekstdə mərkəzə çevirməyin daha mənalı olacağını və təmir xərclərinin yüksək olduğunu bildirib.

Qərarı dəstəkləyənlər hesab edir ki, polis bölməsinə çevrilmə ifrat sağçı qrupların ərazini ziyarətgah yerinə çevirməsinin qarşısını ala bilər.

Avstriya 1938-ci ildə Nasist Almaniyası tərəfindən ilhaq edilib. Ölkə Holokost məsuliyyətini tam qəbul etmədiyi üçün uzun müddət tənqid olunub. Nasistlər dövründə 65 min Avstriya yəhudisi qətlə yetirilib, 130 min nəfər isə sürgün edilib. Keçən il isə Braunauda nasistləri xatırladan iki küçənin adları fəalların etirazları nəticəsində dəyişdirilib.

Qərarın həyata keçirilməsi ölkənin Holokost keçmişi ilə necə üzləşdiyi və tarixlə bağlı simvolik mesajların qorunması məsələlərini yenidən gündəmə gətirib.

Dialoq.az