İmişli şəhərində baş verən gözlənilməz avto-qəza təəssüf doğuran olaydır: hadisə nəticəsində, dünyasını dəyişənlərə rəhmət, yaralananlara şəfa, valideynlərə və qəzəblənmiş doğmalarına səbr arzulayırıq…Ölkədə yüzlərlə, dünyada yüzminlərlə belə avtoqəza baş verir, heç kim bundan sığortalanmayıb və kimsə də istəməz ki, baş versin. DYP əməkdaşları xidməti maşınında boş yolda, heç kimi qovmadan, başqa maşını təqib etməyərək, operativ nəqliyyat vasitəsinin bütün siqnallarını işlədərək, düz yolda gedən zaman, yol hərəkəti qaydasını pozan başqa bir mülki nəqliyyat vasitəsinin sürücüsünün diqqətsizliyi nəticəsində qəzaya düşür.

Verilən məlumata görə, dayısının maşınını qaçırmış təcrübəsiz yeniyetmənin günahı ucbatından hadisə baş verib. Güman ki, xidməti tapşırığı xüsusi rabitə vasitəsi, daha çox isə smartfonla aldığı bir anda bu faciə ilə nəticələnən hadisə – idarəetməni itirməklə ciddi fəsadlarla nəticələnən avtoqəza baş verir. Əlbəttə, dövlət qurumları qəzaya qiymət verəcəklər, fəqət, insanların faciəsi və kədəri üzərində alver edən siyasi və sosial media dəllaları fursətgillik edib yenə qəzəb püskürməyə başladılar. Onlar unudurlar ki, polis və hüquq-mühafizə orqanlarının nümayəndələri olmasa, küçələrimizdə belə qanlı hadisələrin sayı-hesabı olmaz. Üstəlik də polisimizin ciddi nəzarəti olmasa, oğrular gecə çoxlarının evlərini yarar, hətta qorxmadan, nələri varsa, alt paltarlarına qədər, oğurlayarlar.
XX əsrin sonunda ölkəmizdə davamlı olaraq baş verən o cur hərc-mərcliyi nə tez unutdular?! DYP-nin xidməti avtomobilinə xəsarət yetirən qəzəbli kütlə isə unutmamalıdır: o maşınlar elə sizin vergi və dövlət büdcəsinə ödədiyiniz vəsaitlə alınır. Əzdiyinizin yenisini almaq üçünsə, dövlət və xalqın vəsaitini xərcləməli olacağıq. Üstəlik də xidməti nəqliyyat vasitəsinin nə günahı, səbəbkar və günahkar məgər cansız, dəmir maşındır? Sabah o hadisələrə təhrik edilmiş cavanlar həbs edilərək qanun qarşısına çıxarılanda, monitor əjdahaları başqa havalar çalacaq: kimsə özünə əziyyət verib bu təcrübəsiz gəncləri müdafiə etməyəcək…XX və XXI əsrdə göyərtisatanın ölümünü bəhanə gətirib ərəb dünyasını dağıtdılar, xəstə qadının döyülməsini əsas götürüb İranın bütün gücünü məhv etdilər (Fələstin, İraq, Suriyadakı qollarını kəsdilər). İndi isə fürsətdən yararlanıb bizim insanları uçuruma itələmək istəyənlər tapılır. Amma bura savadsız ərəb toplumu, yaxud dinə bürünmüş fars-İran cəmiyyəti də deyilik. Burası Azərbaycan və 44 günlük qəhrəmanlıq yürüşü edən igidlər məmləkətidir. Bu torpaqları ona görə bütövləşdirmədik ki, hansısa gədə-güdələr xarici və daxili düşmənlərin əmrinə, müftə pulqazanmaq eşqinə düşüb bizim insanı öz doğma polisinə qarşı qaldırsin.
Unutmayaq: hər iki Qarabağ müharibəsindən ön cəbhədə igid polislərimiz Vətənin azadlığı uğrunda şəhid və Qazı oldular!
P.S. Səbirli olaq, hüquq-mühafizə orqanlarının istintaqının son nəticələrini gözləyək, qəza qurbanlarının yanında olaq, dövlətimiz kimi…
Dialoq.az