Bu barədə Mərkəzi Aran Regional Təhsil İdarəsi özünün Facebook sosial şəbəkə hesabında paylaşım edib. Paylaşımda deyilir:

"Qeyd etmək istərdik ki, Ucar rayonu Əziz Əliyev adına Qəzyan kənd 2 nömrəli tam orta məktəbin binası yenidən tikilib və yeni tədris ilində şagirdlərin istifadəsinə veriləcəkdir. Həmçinin Mingəçevir şəhəri İlqar Kişiyev adına 17 nömrəli tam orta məktəb əsaslı təmir olunmuşdur.

Bildirmək istərdik ki, təhsil idarəsinin tabeliyində fəaliyyət göstərən 28 məktəbəqədər təhsil müəssisəsində təmir işləri davam etməkdədir. Bundan başqa Zərdab rayon Mikayıl Müşfiq adına Dəli Quşçu və Kürdəmir rayon Axtaçı kənd tam orta məktəbləri üçün 264 yerlik, Yevlax rayon Səməd Vurğun adına 5 nömrəli tam orta məktəb üçün isə 528 yerlik yeni məktəb binalarının tikintisi davam etməkdədir.

Əlavə olaraq bildiririk ki, 2024/2025-ci tədris ilində yeni tikilən və əsaslı təmir olunan məktəblərdə təhsil alan 4053 şagird əvvəlki illərlə müqayisədə daha yaxşı şəraiti, maddi-texniki bazası və infrastrukturu olan məktəblərdə təhsil alacaq,-Deyə paylaşında qeyd edilib".

Dialoq.az