Dialoq.az xəbər verir ki, martın 19-da Kürdəmir şəhər T.İsmayılov adına 1 nömrəli tam orta məktəbdə şagird davranış qaydaları və təhlükəsizliyi mövzusunda maarifləndirici görüş keçirilib.

Görüşdə Mərkəzi Aran Regional Təhsil İdarəsinin müdiri Elçin Kərimov, Kürdəmir rayonu üzrə təhsil sektorunun müdiri Rəfail Məmmədov, Kürdəmir rayon Prokurorluğunun əməkdaşı Mehran Mustafayev, təhsil idarəsinin struktur bölmələrinin əməkdaşları, rayonun təhsil müəssisələrinin rəhbərləri iştirak edib.
Təhsil idarəsinin müdiri Elçin Kərimov şagird davranış qaydalarının təhsilalanların bir sıra hüquq və vəzifələrini təmin etmək məqsədilə ümumi təhsil müəssisəsində nizam-intizamı tənzimləyən qayda və prosedurları müəyyən etdiyini, həmçinin məktəb nüfuzunun artırılması işinə dəstək verdiyini vurğulayıb. İdarə müdiri ümumi təhsil müəssisələrində şagird davranış qaydalarının həyata keçirilməsi və prosesə nəzarətin gücləndirilməsinin, şagird təhlükəsizliyi və sağlamlığı, həmçinin psixoloji dəstək işinin gücləndirilməsinin vacibliyini diqqətə çatdırıb.

Kürdəmir rayon Prokurorluğunun əməkdaşı Mehran Mustafayev təhsilalanların hüquq-vəzifələrinə hörmətlə yanaşmalarını, şərəf və ləyaqətini aşağılayacaq hərəkətlərə yol verməmələrini, bu və ya digər qaydada hüquqi məsuliyyət yaradacaq hərəkətlərə görə Prokurorluq orqanı tərəfindən müvafiq profilaktik tədbirlər görüldüyünü qeyd edib.
Daha sonra ümumi təhsil müəssisələrində şagird davranış qaydaları və valideyn-məktəb münasibətinin tənzimlənməsi ilə bağlı müzakirələr aparılıb, müvafiq mövzularla bağlı verilən suallar cavablandırılıb.







Dialoq.az