Ölkə Prezidenti, Müzəffər Ali Baş Komandan cənab İlham Əliyevin ali rəhbərliyi ilə Azərbaycanın ərazi bütövlüyü tam şəkildə bərpa olunmuş, ötən uğurlu 20 il ərzində dövlətimizin qüdrəti və gücü daha da artmışdır. 44 günlük müharibənin sonunda, yəni, ərazi bütövlüyümüzün təntənəsini özündə əks etdirən 10 noyabr bəyanatının imzalanmasından ötən təxminən 3 il müddətində bütün ərazilərimiz boyunca həm də dövlət suverenliyimizin təmini istiqamətində zərgər incəliyi ilə addımlar atan müzəffər Ali Baş Komandanımız cənab İlham Əliyevin qətiyyəti, dönməz iradəsi və uzaqgörən siyasəti nəticəsində müstəqilliyimiz tarixində ilk dəfə dövlət suverenliyimiz təmin edilmiş oldu. Bu ilin 19 sentyabr tarixində başlanan və 24 saatdan az bir vaxt ərzində uğurla başa çatan anti-terror tədbirləri nəticəsində Xankəndi, Xocalı, Xocavənd, Ağdərə, Əskəran da daxil olmaqla bütün yaşayış məskənlərimizdə separatizmin kökü birdəfəlik və əbədi olaraq kəsildi, bölgəmizlə bağlı tarixi yüzillərə dayanan məkrli planların üzərindən silinməz çalın-çarpaz xətlər çəkildi. Bildiyimiz kimi möhtərəm Prezidentimiz mütəmadi olaraq işğaldan azad olunmuş ərazilərimizə səfər edir, orada aparılan genişmiqyaslı işlərlə yaxından tanış olur, müvafiq tapşırıqlarını verir, eyni zamanda geniş və məzmunlu nitqləri ilə həm xalqımıza növbəti qürur hissini yaşadır, həm də dünyaya milli maraqlarımıza uyğun olan lazımı mesajlarını çatdırır. Məlum olduğu kimi cari ilin 21 dekabr tarixində Xankəndi stadionunda azərbaycanlı azarkeşlərin iştirakı ilə futbol üzrə Azərbaycan Kubokunun 1/8 final mərhələsində Ağdamın “Qarabağ” və Bakının MOİK komandaları arasında oyun keçirilmişdir. Bütün Azərbaycan xalqının sevincinə səbəb olmuş unudulmaz hadisədir. Bəli, ilk dəfədir ki, işğaldan azad edilmiş ərazilərdə futbol matçı keçirilib. Digər xüsusi bir məqam isə odur kiz şəhidlərin ruhuna ehtiram və vətənpərvərlik nümunəsi olaraq, ilk dəfə Xankəndi stadionunda keçirilmiş oyunda qəhrəman şəhidlərimizin uşaqları və ailə üzvləri də iştirak etmişdirlər. Cənab Prezidentin və Birinci xanım hörmətli Mehriban xanım Əliyevanın şəhidlərimizin övladları ilə olan səmimi söhbətləri,davranışları, birlikdə futbol oyununu izləmələri qürurverici hadisədir. Ölkə rəhbərliyinin şəhidlərimizin ailə üzvlərinə olan xüsusi diqqət və qayğısının bariz nümunəsidir. Cənab Prezident tarixi çıxışında qeyd etdi ki, Yaşasın Qarabağ! Yaşasın şanlı Ordumuz! Qarabağ Azərbaycandır! Bundan sonra bütün Qarabağ torpaqlarında Azərbaycan Bayrağı əbədi dalğalanacaq. Azərbaycanlılar bu torpaqlarda əbədi yaşayacaq! Bəli, biz çox xoşbəxtik ki, doğma Qarabağa qovuşduq!
Bir sözlə cənab İlham Əliyevin Xankəndidə olan məzmunlu çıxışı haqqında danışsaq xüsusilə qeyd etməliyik ki, möhtərəm Prezidentimiz Xankəndi şəhərində futbol meydançasına daxil olması, topa ilk olaraq zərbə vurması və ən əsası düşmənlərin gözünə ox kimi batan tarixi çıxışı ilə bütün dünya azərbaycanlılarına qürur hissi yaşatdı və əyani olaraq sübut etdi ki, Qarabağ Azərbaycandır!

Milli Məclisin deputatı İlham Məmmədov

Dialoq.az