Ulu öndər Heydər Əliyev demişdir: "Mən dünyada müəllimdən yüksək ad tanımıram".

Bəli, bu doğrudan da belədir. Hər birimizi yetişdirən, həyata hazırlayan, əlimizdən tutub Vətən sözünü yazdıran müəllimlərimizdir. Müəllim peşəsi dəyərli və müqəddəs peşədir. Bu barədə Dialoq.az saytına fikirlərini bildirən yazıçı, şair, hərbi ekspert Natiq Əlisoy müəllim adı ilə bağlı maraqlı faktlara toxunub. O bildirib ki, ölkəmiz günü-gündən sürətlə inkişaf edir. İnkişaf edən ölkəmizin əsas sahələrindən biri də təhsildir. Təhsil hər bir dövlətin düşünən beyni və nəfəsidir. Əgər bir millətin təhsili yoxdursa deməli o dövlət tezliklə fəlakətlər içində boğulub məhv olmağa məhkum olacaqdır. Əlbəttə ki, təhsilin inkişafı dövlət siyasətinin əsas prioritetlərindəndir. Hər bir dövlət çalışmalıdır ki, onun təhsili yüksək səviyyədə olsun. Bunun üçün böyük yol keçmək lazımdır. Düşünürəm ki, biz bu tarixi yolu keçmişik. Bu gün Azərbaycan təhsili yüksək səviyyədədir. Bu gün gənclərimiz yüksək təhsillə bərabər yüksək vətənpərvər ruhda tərbiyə olunurlar. Bu işdə müəllimlərimizin zəhməti danılmazdır. Nümunə üçün şəxsi müşahidələrimə əsasən deyə bilərəm ki, ölkəmizin bütün təhsil müəssisələrində olduğu kimi Yevlax şəhər Səməd Vurğun adına 5 nömrəli tam orta məktəbin 3 "A" sinfində gənclərə vətənpərvərlik tərbiyəsinin aşılanması yüksək səviyyədə aparılır. Qeyd edə bilərəm ki, hətta bu istiqamətdə Yevlax şəhər Səməd Vurğun adına 5 nömrəli tam orta məktəbin 3 "A" sinfi və sinif müəlliməsi İsgəndərova Gülnur Tofiq qızı rayon məktəbləri arasında ön sıralardadır. Gənclər bizim gələcəyimizdir, onların təlim-tərbiyəsi, bilik və bacarığı bizlər üçün çox vacibdir. Ümid edirəm ki, getdiyimiz yolla Azərbaycan gəncliyi növbəti illərdə daha da yüksək zirvələri fəth edəcəkdir, - Deyə Natiq Əlisoy bildirib.






Yazıçı, jurnalist, hərbi ekspert Natiq Əlisoy

Dialoq.az