Ehtiyatda olan zabit, hava hücumundan müdafiə mütəxəssisi, yazıçı Natiq Əlisoy "Dialoq.Az" saytına maraqlı açıqlama verib:
-Bu barədə ilk dəfə danışsam da, ancaq bir neçə aydır ki, yeni hərbi-elmi iş üzərində çalışıram. Mən 20 il Azərbaycan Ordusunda Hava Hücumundan Müdafiə Qoşunlarında müxtəlif vəzifələrdə zabit kimi xidmət etmişəm, ali hərbi təhsilli zabitəm. Mən hər zaman bu sahədə yeniliklər haqqında ciddi düşünmüşəm. Bu gün müasir döyüşün əsas aparıcı qüvvələrindən hesab olunan hava hücumundan müdafiə qoşunlarının döyüşdə fəaliyyəti əvəzsizdir. Belə ki, düşmənin hava hücum vasitələrini, pilotsuz uçuş aparatlarını, reaktiv-artilleriya sistemlərini hava hücumundan müdafiə sistemlərindən başqa məhv edəcək başqa bir qoşun növü yoxdur. Düzdür, bu gün Azərbaycanın Hava Hücumundan Müdafiə Qoşunları kifayət qədər döyüş qabiliyyətinə, müasir döyüş texnikalarına və peşəkar döyüşçülərə sahibdir. Ancaq, hesab edirəm ki, elm, texnika və idarəetmə üsulları hər saniyə dəyişir, inkişaf edir. Bir neçə ildən sonra bizim bu gün müasir hesab etdiyimiz döyüş texnikası və döyüş üsulu köhnələcək. Biz klassik hava hücumundan müdafiə döyüşündən və idarəetmə üsulundan yavaş-yavaş uzaqlaşmalıyıq. Elə bir sistem yaratmalıyıq ki, nəinki düşmən, hətta bütün dünya orduları bu sistemin əsas özəlliklərini və daxili sirlərini açmaq üçün on illər sərf etsin. Hər kəsə məlumdur ki, bu gün bir çox ölkələr, o cümlədən Azərbaycan keçmiş SSRİ ordusunun döyüş üsulundan, döyüş texnikasından və taktikasından müəyyən qədər qarışıq şəkildə istifadə edir. Düzdür, texnikalar modelləşdirilsə də, ancaq baza prinsipi, idarəetmə üsulu, düşünən beyinlər olduğu kimi qalıb. Bu barədə çox danışmaq olar, ancaq hesab edirəm ki, danışmaqdansa əməli işlər görmək lazımdır. Biz heç vaxt düşünməməliyik ki, biz heçnə yarada bilmərik, bizim buna elmi düşüncəmiz çatmaz. Odur ki, qısa olaraq onu deyə bilərəm ki, mənim düşündüyüm sistem (lahiyə) elə bir sistem olacaq ki, dünyada ilk olacaq və o sistemin tətbiq olunduğu əraziyə düşmənin hava hücum vasitəsi yaxınlaşa bilməyəcək. Əlbəttə ki, bu çox çətin və məsuliyyətli bir işdir, bunun üçün çox gərgin çalışıram, araşdırmalar aparıram. Bəlkə də bu xəbər bir çoxlarına gülməli də gələ bilər, ancaq biz bunun öhtəsindən gələcəyik. Hesab edirəm ki, bu sistem üzərində bəlkə də bir neçə ay, bəlkə də bir neçə il ciddi çalışmalıyam. Yaradacağım yeni sistemi ilk olaraq Azərbaycan Ordusuna təklif edəcəyimi qərarlaşdırmışam. Azərbaycan Ordusu bu sistemi qəbul etməsə başqa ordulara da təklif edəcəyimi düşünürəm,-Deyə Natiq Əlisoy bildirib.

Dialoq.Az