Bu gün kiməsə arxayın olmaq olar, ancaq səhər havanın necə olacağı bəlli deyil!

Yazıçı, Azərbaycan Jurnalistlər Birliyinin üzvü, hərbi ekspert Natiq Əlisoy Dialoq.az saytına açıqlama verib:
Dörd aya yaxındır ki, Cənab Prezidentə, Müzəffər Ali Baş Komandana hüquqlarımın pozulmasına görə (qanunsuz olaraq on minlərlə məvacibim kəsilib və ordu sıralarından tərxis olunduğum zaman səhhətim düzgün şəhadətləndirilməyib) ərizə ilə müraciət etmişəm. Əlbəttə ki, Cənab Prezidentə müraciət edənə qədər Azərbaycan Respublikası Müdafiə Naziri də daxil olmaqla bir neçə ünvana qanunla müəyyən olunmuş qaydada ərizə ilə müraciət etmişdim. Müraciətlərimə baxılmadı, əsassız və qanunsuz cavablar yazıldı. Son olaraq Cənab Prezidentə ünvanladığım müraciət araşdırılma üçün aidiyyatı üzrə birbaşa əvvəllər xidmət etdiyim Naxçıvan Əlahiddə Ümumqoşun Orduya, Ordu Komandanının müavini general-leytenant Fazil Ağalarova göndərildi! Təsəvvür edin ki, dörd aya yaxındır ki, Cənab Ali Baş Komandana yazdığım ərizəyə bir general cavab vermək istəmir. Maraqlıdır! Hesab edirəm ki, hüquqlarımın pozulmasında yəqin hörmətli Fazil müəllim elə birbaşa indidən özünü günahkar hesab edir! Çünki sözügedən məsələdə mənə dəyən on minlərlə maddi ziyanlığın birbaşa günahkarlarından biri elə Fazil bəyin özüdür. Ona görə də yazdığım müraciəti araşdırıb cavab yazmaq istəmir. Ancaq bu o demək deyil ki, hörmətli Fazil bəy bununla yaxasını qurtara biləcək. Necə deyərlər "borclu borclunun sağlığını istər". Yəqin ki, vurduğu on minlərlə ziyanlığın on qat təzminatını ödəyəndə qanunların ali olduğunu və Cənab Prezidentə ünvanlanan ərizəyə cavab verməməyin nəticələrini hiss edər!


Dialoq.az