Ömrünün böyük hissəsini xanəndəlik sənətinə həsr etmiş bu böyük sənətkar və nəcib xanım səsi ilə ürəklərdə, ürəyi ilə isə yaşadığı füsünkar gözəlliyə malik, söz-sənət beşiyi hesab olunan İsmayıllı rayonunda böyük hörmət qazanmışdır. Ona, İsmayıllı rayonunda zəhmətkeş və qayğıkeş İsmayıllılar tərəfindən hörmət və ehtiram əlaməti olaraq İsmayıllının xalq artisti də deyirlər. Sahibə Abdullayeva,-Bu ad hər kəsə doğma və əziz olmaqla yanaşı, eyni zamanda həm də bir həyat məktəbidir. Mübaliğəsiz desək xanım olmasına baxmayaraq hər zaman "kişi qeyrəti" ilə kişi kimi meydanlarda, dövlət tədbirləri və el şənliklərində sözünü deyib, zəhməti ilə haqqını qazanmışdır. Uşaqla-uşaq, böyüklə-böyük, alimlə-alim, kasıbla-kasıb, varlı ilə-varlı kimi danışmağı bacaran "Dağlar qızı" heç zaman heç kimin haqqını taptalamamış və heç kimə öz haqqını təslim etməmişdir. Ta gənc yaşlarından dost-tanış, qohum-əqrabə, el-oba arasında yaşayıb yaratmış bu gözəl xanım sadə vətəndaş təşəkküründən tutmuş ali dövlət mükafatlarına kimi saysız-hesabsız mükafatlarla, fəxri fərmanlarla mükafatlandırılmışdır. Hamımızın əzizi, dəyərli sənətkar Sahibə xanım Abdullayevanın həyatı, yaradıcılığı, səhnə fəaliyyəti, xeyirxahlığı, insanpərvərliyi, doğulduğu məkan və ocaq haqqından uzun illər idi ki, çox eşidirdim. Sahibə xanım haqqında deyilən bütün müsbət keyfiyyətləri rəqəmlərlə, faiz və statistik göstəricilərlə müqayisə etmək, onun şəxsiyyəti haqqında yazılmış yazıları, məqalələri kənardan oxumaqla yox, yaxından görmək, hiss etmək üçün həyatım boyu heç zaman getmədiyim, həmişə getmək və gəzməz istədiyim İsmayıllı rayonu böyük sənətkar Sahibə Abdullayevanın böyük ürəyi ilə ailəmlə birlikdə məni öz qoynuna qonaq dəvət etdi. "Nə yaxşı ki, qismət oldu, gələ bildim dağlar qızı". Söz var dastanlara sığmaz, söz var bir dastanı ifadə edər. Nə demək istədiyimi yəqin ki, hissiyyatlı oxucular duydular. Üç gün bir insanı tanımaq yetərli vaxt olmasa da, Sahibə xanımın qonaqlarına hər zaman isti qucağını açan doğma evində qonaq olduğum müddətdə keçən saatlarımı saniyələrlə dəyərləndirib qələmimi əlimə almağa güc tapdım. "Dağlar qızı", əzizimiz Sahibə xanım, sizə uzun ömür, can sağlığı, gözəl və firavan həyat arzu edirəm. Nə yaxşı ki, sizi tanıdım. Doğum gününüz mübarək!

Dağlar qızı.
Nə yaxşı ki, qismət oldu,
Gələ bildim dağlar qızı.
İsmayıllı dağlarını,
Görə bildim dağlar qızı.

Sevdim Lahıc çöllərini,
Qoxuladım güllərini,
Bu yerlərin sirlərini,
Bilə bildim dağlar qızı.

Gülyan kəndin dağın-daşın,
Seyr etdim al qumaşın,
Gözlərimdən kədər yaşın,
Silə bildim dağlar qızı.

Bulaqları gəzə-gəzə,
Valeh oldum dağa-düzə.
Ürəyimi verib sözə,
Gülə bildim dağlar qızı.

Qələmimi aldım ələ,
Əlisoyam, gəldim dilə,
Dərdlərimi dağlar ilə,
Bölə bildim dağlar qızı.
___________________________________
Natiq Əlisoy, şair, yazıçı, Azərbaycan Jurnalistlər Birliyinin üzvü, "Qızıl qələm", "Ulu Öndər", "Ali Baş Komandan" "İlin vətənpərvər şairi" media mükafatları laureatı.