Bakı şəhərində və bölgələrdə fəaliyyət göstərən "BOLT", "UBER" kimi taksi şirkətlərində sürücü işləyən sürücülərin böyük əksəriyyəti ehtiyatda olan zabit və gizirlərdir. Məsələni araşdırmaq üçün kimliyimi (ehtiyatda olan zabit olduğumu) bildirmədən sərnişin kimi əyləşdiyim taksilərdə sürücünün ehtiyatda olan hərbçi olduğunu görüb bir neçə yoxlama sualları ilə kiçik araşdırma apardım. Verilən suallara cavab olaraq həmsöhbət olduğum ehtiyatda olan hərbçilərin müəyyən hissəsi qüruruna sığışdırmayıb sadəcə boşluqdan taksi sürürəm desə də böyük əksəriyyəti işsizlikdən, yaşamaq üçün mənzillərinin olmamasından və bu səbəbdən kirayə pullarını çatdıra bilməməsindən ciddi şikayətləndi. Sözün açığı çox təsirləndim, hətta məni qəhər boğdu!
Bilirsiniz, ailəni dolandırmaq üçün, maddi ehtiyacları qarşılamaq üçün hər hansı işlə məşğul olmaq ayıb deyil, ayıb bilirsinizmi nədir? Ayıb odur ki, həyatını dövlət, millət, xalq üçün fəda etmiş insanların bu dövlətdə, dövlət orqanlarında rəsmi iş tapa bilməməsi və sonda son çıxış yolu kimi taksi sürücülüyünə üz tutmasıdır. Söz sözə gələndə müəyyən aidiyyatı orqanlar böyük-böyük danışırlar! Sual yaranır, bəs onda o orqanlar görmürlər ki, onun hərbçisi necə yaşayır? Onlar görmürlər ki, ehtiyatda olan zabit və gizirlərin böyük əksəriyyəti taksi sürür, hardasa qapıda mühafizəçi dayanır, hansısa dükanlarda satıcı işləyir? Bəs ayıb deyil ki, kapitan, mayor, polkovnik-leytenant rütbəsində olan ehtiyatda və istefada olan hərbçilər kimlərinsə əlinin altında qul kimi işləyirlər? Bəs onda qürur, mənlik, mənəviyyat? Olmaz ki, dövlət özü həmin hərbçiləri dövlət orqanlarında, idarə və təşkilatlarda işlə təmin etsin? İndi bir çox ağıllılar deyəcək ki, bu gün ehtiyatda olan hərbçilərin çoxu dövlət orqanlarında işlə təmin olunub! Sadə bir cavabla həmin şəxslərə bilərmək istəyirəm ki, bu gün dövlət orqanlarında işləyən 5-10 faiz ehtiyatda olan hərbçilərin adamı olmasa onları heç yerdə işə götürməzlər! Biz bu gün deyirik ki, türk ordusuna uyğun ordu qururuq. Necə qururuq? Gedin görün türk ordusunun ehtiyatda olan zabiti taksi sürür? Məktəblərdə qapıda mühafizəçi durur? Satıcı işləyir? Hesab edirəm ki, bu ordumuza və onun hərbçisinə qarşı böyük mənəvi zərbə və xarici düşmənlərin gələcəkdə ordumuzun zəifləməsinə hesabladığı təxribatıdır.

Yazıçı, Azərbaycab Jurnalistlər Birliyinin üzvü, hərbi ekspert Natiq Əlisoy