Bildiyiniz kimi son zamanlar sosial mediada ehtiyatda olan zabitlərimizlə bağlı bir neçə videogörüntülər yayılmaqdadır. Əlbəttə ki, bu görüntülərin yayılması və ictimailəşməsi heç birimiz üçün xoş deyil və heç birimiz bu kimi addımları düzgün hesab etmirik. Peşəkar hərbçilər yaxşı bilir ki, yaxşı hərbçi olmağın əsas şərtləri hərbçinin qürurlu, mətin, döyüşkən, intizamlı, milli-mənəvi dəyərlərə sadiq, dövlətçilik prinsiplərini bilən, vətənini, bayrağını sevən, mənəvi-psixoloji və fiziki cəhətdən sağlam və s. olmasıdır. Hər birimiz yaxşı bilirik və başa düşürük ki, ordu cəmiyyətin bir hissəsidir, cəmiyyətdə baş verən hadisələr ordu sıralarında da baş verir. Yaxşı, bəs onda bizlər üçün maraqlı deyil ki, mükəmməl ordu quruculuğu prinsipinin kökündə dayanan yuxarıda sadaladığım əsas şərtləri ömrü boyu öyrənən, bunun üçün xüsusi təlimlər keçən və Vətən qarşısında sədaqət andı içən, həyatını hərb peşəsinə qurban verən şəxslərin birdən-birə narazılıqla çıxış etməsi nədən irəli gəlir? Əlbəttə ki, bu mövzu nəinki bizi maraqlandırmalı, hətta bizi ciddi narahat etməlidir. Ancaq, edirmi? Edirsə hansı dərəcədə edir? Bax məsələ bundan ibarətdir! Bəli, biz bilirik ki, Silahlı Qüvvələrimizin Ali Baş Komandanı Cənab İlham Əliyev ordu quruculuğu istiqamətində böyük uğurlara imza atıb və atmaqdadır, ordumuzu gücləndirməklə bizlərə tariximizdə qızıl hərflərlə yazılmış "44 günlük Zəfər"imizi qazandırıb. Onu da bilirik ki, Cənab Ali Baş Komandan hər dəfə çıxışlarında ordu quruculuğu ilə bağlı xüsusi tapşırıqlar verir, Şəhid ailələrinin, Qazilərimizin müraciətlərini dinləyir və həll edir, hərbi qulluqçuların sosial şəraitinin yaxşılaşdırılması istiqamətində uğurlu addımlar atır. Qısası desək Müzəffər Ali Baş Komandanımızın ordu quruculuğu ilə bağlı atdığı uğurlu addımlar müzakirə olunmazdır. Bəs yaxşı gəlin düşünək görək ehtiyatda olan zabitlərimizi narazı salan, onların müraciətlərinə, xahişlərinə əhəmiyyət verməyən, ordumuzun uğurlarına kölgə salmağa çalışan kimdir və yaxud kimlərdir? Əlbəttə ki, bunu araşdırmaq və kimlərisə ittiham etmək nə bizim səlahiyyətimizdədir, nə də bizim işimizdir. İnanırıq ki, sözügedən mövzu ilə bağlı lazımı araşdırma aparılar.
Qarabağ Azərbaycandır!
___________________________________________________
Azərbaycan Jurnalistlər Birliyinin üzvü
Natiq Əliyev