Əmirov Elnur Elşən oğlu, bu ad hər kəsə tanışdır. Sənət adamları və ictimayət arasında Elnur Baxış kimi tanınan yazıçı, bəstəkar böyük ürəyi, səmimiyyəti və xeyirxahlığı ilə hər kəsin hörmətini qazanmışdır. "Mənim üçün maddiyat heç zaman ön planda olmamışdır, mən hər zaman dostlarımla mənəvi dünyamla dostluq etmişəm". Bu sözləri hər zaman dilində və ürəyində şüar edən yazıçı, bəstəkar Elnur Baxış dediyi kimi görünmüş və göründüyü kimi olmuşdur. Bu yaşıma qədər çox insanları tanımışam, çoxları ilə çox yoldaşlığım və yolçuluğum olub. Hər kəs kimi mən də hər zaman səmimi, mehriban və ən əsası etibarlı dost axtarışında olmuşam. Hər zaman istəmişəm ki, salam verdiyim adamın sözün əsil mənasında "adamlığı və insanlığı" olsun. Bu axtarışda bəzən yanılmışam, bəzən isə sevinmişəm. Elnur Baxış şəxsiyyəti, mənliyi, səmimiyyəti və etibarı ilə məni hər zaman sevindirən dostlarımdandır. Kimisə yalandan tərif etmək, olmayanı şişirtmək, ağ yalanın üstünə "qırmızı xalı" çəkib pislikləri ört-basdır etmək həmişə xarakterimə yad olub. Bu yadlıqla bərabər son nəfəsdə olsam belə kiminsə haqqını itirməyi, olanı danmağı, yaxşıya pis, pisə yaxşı deməyi şəxsiyyətimə sığışdırmamışam. Mərd insanlar, əsil kişilər, insan kimi insan olan şəxsiyyətlər haqqında danışarkən onun vəzifəsinə, puluna, malına, dövlətinə baxmamışam. "Qızıl yerdə qalmaz, yaxşılıq yolda" yaxşı deyib atalar. Haqqında ürəklə bəhs etdiyim və bəhs etməyə borclu olduğum əziz dostum, şəxsiyyətinə hər zaman hörmətlə yanaşdığım Elnur Baxış məhs yaxşılıqları, böyük ürəyi ilə öz adını ürəklərə qızıl hərflərlə yazmışdır. O, maddi imkanı olmaya-olmaya imkansızlara dəstək olur, xəstələrə sağalması üçün yardımlar edir, ümidsizlərin gözlərində Allahın izni ilə ümid çırağının yanmasına vəsilə olur, küsülü olanları barışdırır, insanlar arasında dostluq, səmimiyyət yaradır, yaradıcı insanların yaradıcılığını dünyanın dörd bir yerində təmənnasız təbliğ və tədqiq edir, yazır, yaradır, sevir, sevdirir bir sözlə qeyri-adi xarakteri ilə əsil insan kimi yaşayır. Yaxşı anlayıram, bir çoxlarınız deyə bilərsiniz ki, indiki zəmanədə belə insan var?! Bəli-bəli var! İnsanlıq ölsə də hələ də ruhu canından çıxmayıb. Elnur Baxış kimi insanların ruhunda yaşayan insanlıq hələ ki, bizi tərk etməyib. Siz hər zaman onu görə, hiss edə bilərsiniz, yoxlayıb toxuna bilərsiniz. Qapısını döysəniz sizə gəl, əl uzatsanız sizə can deyəcək. Məss bu xüsusiyyətinə, hərərətinə, mülayimliyinə və ürəkaçıqlığına görə dostlarını öz ətrafına cəm etməyi bacaran bu gözəl insan dünyanın bütün bölgələrində özünə dost qazanmışdır. Yaxşı ürəkdən yaxşı fikirlər, təmiz ruhdan ülvi duyğuların süzülməsi xoşbəxtlikdir. Elnur Baxış qeyd etdiyim kimi eyni zamanda yazıçı və bəstəkardır. Onun yazdığı yazıları oxuduqca, bəstələdiyi musiqiləri dinlədikcə küsmüş könül sevinir, əsəbdən qırış almış üzlər nur saçır. Qələmin iti, ürəyin var olsun dəyərli insan! Yazmaq, yaratmaq sənin haqqın, sevmək, sevilmək sənin dəyərindir!
___________________________________________________
Yazıçı, şair, jurnalist Natiq Əlisoy