Yevlax rayonunun Çənlibel qəsəbəsində yerləşən 20 Yanvar abidəsi adlanan ərazidə yaşıllığın qorunmaması və ümumi vəziyyət sakinlərin narahatlığına səbəb olub.

Dialoq.az xəbər verir ki,sakinlərin sözlərinə görə həmin ərazi illər əvvəl onların öz təşəbbüsü ilə salınıb. Burada ağaclar əkilib, yaşıllıq yaradılıb və uzun müddət sakinlər özləri ağaclara qulluq göstəriblər.

Sakinlər bildirirlər ki, daha sonra bu ərazidə Birinci Qarabağ müharibəsi şəhidlərinin xatirəsinə həsr olunmuş guşə yaradılıb. Onların sözlərinə görə, bu yer qəsəbə sakinləri üçün xüsusi əhəmiyyət daşıyır.

Sakinlərin iddiasına görə, əvvəllər burqda ağaclar suvarılıb və ərazinin təmizliyinə diqqət göstərilib. Onların sözlərinə görə, artıq təxminən 3 ilə yaxındır ki, ağacların sulanmasında çətinlik yaranıb və nəticədə ağacların bir qismi quruyub, digər ağacların isə quruma təhlükəsi yaranıb.

Sakinlərin sözlərinə görə, əvvəllər ərazidə təmizlik və yaşıllığa qulluq işlərini həyata keçirən şəxslər olub və həmin dövrdə əraziyə mütəmadi baxış keçirilib. Onlar bildirirlər ki, hazırda isə bu işlər həyata keçirilmir. Nəticədə ərazidə natəmizlik yaranıb və ümumi baxımsızlıq müşahidə olunur.

Sakinlər qeyd edirlər ki, 20 Yanvar abidəsi adlanan bu ərazi qəsəbə sakinləri üçün xüsusi əhəmiyyət daşıyır. Onlar aidiyyəti qurumlardan əraziyə diqqət göstərilməsini, təmizlik və abadlıq işlərinin həyata keçirilməsini, yaşıllığın qorunması üçün tədbirlər görülməsini istəyirlər.

Dialoq.az