Ağdaş rayonunun Qaradeyin, Eymur, Ərəbşəki və Ağcaqovaq kəndlərini birləşdirən yol xəttində yenidənqurma işləri davam etdirilir.

Dialoq.az xəbər verir ki,Qaradeyin kəndindən başlayaraq Ağcaqovaq kəndinə qədər uzanan yolun ümumi uzunluğu 18 kilometr təşkil edir. Layihə rəhbərinin verdiyi məlumata görə, hazırda yolun müxtəlif hissələrində torpaq işləri, əsasın möhkəmləndirilməsi və asfaltlanmaya hazırlıq mərhələləri aparılır. Bildirilir ki, layihənin 2026-cı ilin sonuna kimi tam başa çatdırılması və yolun istifadəyə verilməsi planlaşdırılır.

Yeni yol xətti kəndlərarası əlaqəni gücləndirməklə yanaşı, sakinlərin gündəlik hərəkətini, kənd təsərrüfatı məhsullarının daşınmasını və təcili xidmətlərin hərəkətini xeyli asanlaşdıracaq. Çəkiliş zamanı kənd sakinləri müsahibə verərək yolun əvvəlki vəziyyətindən, mövcud çətinliklərdən və görülən işlərin əhəmiyyətindən danışdılar və yeni yolun kəndlərin inkişafına böyük töhfə verəcəyini bildirdilər.

Xatırladaq ki, Prezident İlham Əliyev Ağdaş rayonunun Davudlu–Binələr–Güvəkənd–Əmirarx–Qaradeyin–Eymur–Ərəbşəki–Ağcaqovaq avtomobil yolunun əsaslı təmiri ilə bağlı tədbirlər haqqında Sərəncam imzalayıb. Sərəncama əsasən doqquz min nəfər əhalinin yaşadığı 8 yaşayış məntəqəsini birləşdirən Davudlu–Binələr–Güvəkənd–Əmirarx–Qaradeyin–Eymur–Ərəbşəki–Ağcaqovaq avtomobil yolunun əsaslı təmiri məqsədilə ilkin olaraq, Azərbaycan Avtomobil Yolları Dövlət Agentliyinə 1.5 milyon manat vəsait ayrılıb.

Dialoq.az