26 iyul 2024-cü il tarixdə Yevlax Şəhər İcra Hakimiyyətinin və Azərbaycan Vətən Müharibəsi Veteranları İctimai Birliyinin birgə təşkilatçılığı ilə Yevlax rayonunda “Müharibə veteranlarının hüquqi maarifləndirilməsi" mövzusunda seminarın keçirilməsi haqqında məlumat vermişdik.

Qeyd etmək istəyirik ki, keçirilən sözügedən tədbirə veteranların yalnız bir qrupunun dövlət olunması və xüsusilə, ancaq Birinci Qarabağ müharibəsi veteranlarının dəvət olunması, 44 günlük Vətən müharibəsi veteranlarının və tədbirə dəvət olunmayan digər Birinci Qarabağ müharibəsi veteranlarının ciddi narazılığına səbəb olub.

Bu barədə 44 günlük Vətən müharibəsi qazisi və veteranı, "Azərbaycan Bayrağı" ordenli, Azərbaycan Respublikası Milli Qəhrəmanları Tanıtma İctimai Birliyinin Yevlax Rayon Nümayəndəliyinin sədri, ehtiyatda olan mayor Mədəd Süleymanov özünün Facebook sosial şəbəkə hesabında paylaşım edib. Paylaşımda deyilir:

"Vətənimizin azadlığı uğrunda xüsusi xidmətləri olmuş hər bir Azərbaycan oğlu ən yüksək hörmət və diqqətə layiqdir! Bu birmənalıdır! Lakin bir veteran, qazi və "Azərbaycan Bayrağı" ordenli şəxs kimi mənə çox maraqlıdır ki, Yevlax Şəhər İcra Hakimiyyəti bu kimi addımları atmaqla nə etmək istəyir? Açıq bildirməliyəm ki, əslində mən bu məsələdə bir başa Yevlax Şəhər İcra Hakimiyyətinin Rəhbərliyini günahkar hesab edirəm! Ölkəmizin azadlığı uğrunda canlarını fəda etmiş Şəhidlərimizə və onların ailələrinə, qazilərimizə, veteranlarımıza fərq qoymaq olmaz! Təəssüflər olsun ki, Yevlax Şəhər İcra Hakimiyyəti hər zaman bunu edir! Necə ola bilər ki, bir rayonda veteranlarla görüş keçirilir, keçirilən tədbirə 5-10 Birinci Qarabağ müharibəsi veteranı dəvət edilir digərləri isə çağırılmır! Əslində bir neçə ildir mən Yevlax Şəhər İcra Hakimiyyətinin Başçısı hörmətli Anar Tağıyevə bunu sübut etməyə çalışırdım ki, Siz Şəhid ailələri, veteranlar, qazilər arasında fərq qoyursunuz. Bu dəfə nəyisə izah etməyə ehtiyac qalmadı! Bir tədbir keçirilirsə ora hər kəs dəvət edilməlidir! Şəhidlərimizin, qazilərimizin və veteranlarımızın hər biri bizim üçün əziz və doğmadır. Biz hər zaman istəmişik ki, bu doğmalıq qorunub saxlanılsın. Çünki bu tövsiyyəni və tapşırığı bizə Müzəffər Ali Baş Komandanımız cənab İlham Əliyev verir! Təəssüflər olsun ki, Yevlax Şəhər İcra Hakimiyyəti hər zaman bu doğmalığın içərisinə nədənsə yad və ögey münasibət qatmağa çalışır. Təəssüflər...,-Deyə Mədəd Süleymanov bildirib".

Dialoq.az