Bir neçə ay əvvəl Naxçıvan Əlahiddə Ümumqoşun Ordudan 20 il xidmət etdikdən sonra ehtiyata buraxıldım. Ehtiyata çıxmağımın səbəbi general-polkovnik Kərəm Mustafayevin Azərbaycan Respublikası Müdafiə Nazirinin müvafiq əmrinin tələblərini yerinə yetirməməsi oldu (Əgər buna şübhə edənlər varsa o zaman Kərəm Mustafayev son 10 ildə Naxçıvan Əlahiddə Ümumqoşun Ordunun zabitlərinin birliklərarası yerdəyişmə (rotasiya) planını MN-nin müvafiq əmrinin tələblərinə uyğun dövlətə təqdim etsin). Belə ki, MN-nin əmrinə əsasən mən zabit kimi Naxçıvanda 6 il xidmət etməli olduğum halda 12 il xidmət etdim. Kərəm Mustafayev imkan vermirdi ki, zabitlərin yerdəyişməsi (bir korpusdan digər korpusa xidmət yerinin dəyişdirilməsi, rotasiyası) yerinə yetirilsin. O tələb edirdi ki, yalnız mənim dediyim olmalıdır, mən heç bir qanun, əmr tanımıram, qanun mənim dediyimdir. Beləliklə mən və mənim kimi onlarla zabit ordu sıralarından tərxis olmağa məcbur oldu. Bunu görən Kərəm Mustafayev qisas almaq üçün bizim bütün sənədlərimizi, şəxsi işlərimizi ləkələməyə çalışdı, imtiyazlarımızı əlimizdən aldı, xəstəliyi olan zabitləri saxta müayinələrlə sağlam kimi yazdırdı. Nəticədə mənim də xəstəliyim Naxçıvan Mərkəzi Hərbi Həkim Komissiyası tərəfindən düzgün şahadətləndirilmədi. Bildirim ki, ötən illərdə Naxçıvanda Mərkəzi Hərbi Həkim Komissiyası yox idi, iki il əvvəl Kərəm Mustafayev Naxçıvanda hərbi həkim komissiyası yaratmaqla Müdafiə Nazirliyindən asılılığını azaltmağa çalışmış və bundan öz məqsədləri üçün istifadə etməyə çalışmışdır. Sual çıxır ki, axı bir orduda nə üçün iki Mərkəzi Hərbi Həkim Komissiyası olmalıdır? Kərəm Mustafayev hər zaman çalışmışdır ki, istədiyi hərbi qulluqçuya istədiyi diaqnozu qoydurmaq üçün tabeliyində Mərkəzi Hərbi Həkim Komissiyası olsun. Qısa desək Bakıya tabe olmasın.
Mən ordu sıralarından tərxis olan zaman Kərəm Mustafayevin yaratdığı Naxçıvan Mərkəzi Hərbi Həkim Komissiyasından narazı qaldım və bunun üçün şəxsən Azərbaycan Respublikası Müdafiə Nazirinə dəfələrlə müraciət etdim. Müraciətimdə bildirdim ki, mən Naxçıvan Mərkəzi Hərbi Həkim Komissiyasının qərarından narazıyam, xahiş edirəm mənim yenidən şəhadətləndirilməm üçün müvafiq tapşırıq verəsiniz.

“Hərbi-həkim ekspertizası haqqında Əsasnamə”nin təsdiq edilməsi barədə Azərbaycan Respublikası Nazirlər Kabinetinin Qərarı:
Maddə 1.9. Vətəndaş hərbi-həkim komissiyasının (həkim-uçuş komissiyasının) onun barəsində çıxarılmış qərarından razı olmadıqda, həmin dövlət orqanının yuxarı hərbi-həkim komissiyasına (həkim-uçuş komissiyasına) və ya məhkəməyə şikayət verə bilər.
Yuxarı hərbi-həkim komissiyasının (həkim-uçuş komissiyasının) və ya məhkəmənin qərarı ilə vətəndaş nəzarət qaydasında müayinəyə və təkrar şəhadətləndirilməyə göndərilə bilər.

Etdiyim təkrar müraciətlərə baxmayaraq hər dəfə mənə saxta, yalan sənədlər göndərildi. Hətta hər dəfə göndərilən sənədlərdə xəstəliyimə bağlı ayrı-ayrı maddələr qoyuldu. Onu da bildirim ki, MN-nə etdiyim müraciətlərə Naxçıvan Əlahiddə Ümumqoşun Ordu cavablar yazırdı. Hansı ki, mən onlardan şikayətçi idim. Mənim şikayətçi olduğum şəxs, qurum, orqan nə üçün mənə cavab yazmalıdır ki? Nəhayət mən məcbur qalıb Cənab Ali Baş Komandana məktubla müraciət etdim. Lakin bu dəfə də mənə verilən cavab qanuna zidd olmaqla yanaşı Cənab Ali Baş Komandana yazdığım məktuba diqqətsizlik oldu. Vətəndaşı aldatmaqdan qorxmayan şəxslər Cənab Ali Baş Komandanı da aldatmağa cəhddən çəkinmədilər. Onlar anlamaq istəmirlər ki, əgər mən Naxçıvan Mərkəzi Hərbi Həkim Komissiyasından narazıyamsa təkrar orada şəhadətləndirilə bilmərəm. Məni təkrar ya Müdafiə Nazirliyinin Mərkəzi Hərbi Həkim Komissiyası şəhadətləndirməlidir, ya da mən məhkəməyə müraciət etməliyəm. Məhkəməyə müraciət etmək hüququmu bilsəm də ancaq, hesab edirəm ki, zabit adi məsələ üçün məhkəmələrə üz tutmamalıdır. Müdafiə Nazirliyinin Mərkəzi Hərbi Həkim Komissiyasının Kərəm Mustafayevin diktəsi ilə mənə göndərdiyi məktubu olduğu kimi sizlərə təqdim edirəm. Bu bir başa Azərbaycan Respublikası "Nazirlər Kabinetinin Qərarı"na zidd və hörmətsizlikdir.


Natiq Əlisoy

Dialoq.az