Bu gün nədənsə bir çox şəxslər (hətta bir çox vəzifəli şəxslər) barələrində kütləvi informasiya vasitələrində yayılan, dərc olunan məlumatlara şəxsən cavab vermək əvəzinə pulla tutduqları trolları vasitəsi ilə cavab verməyə çalışırlar. Maraqlısı da odur ki, həmin şəxsləri "təmsil edən" trollar özlərini sözügedən şəxslərə guya tamam yad adamlar kimi təqdim edirlər və bu isə dərhal aşkara çıxır. Misal üçün: Bir şəxsi sosial şəbəkədə haqlı olaraq fəaliyyətsizliyinə, qanunsuz əməllərinə görə tənqid edirsən (Azərbaycan Respublikasının konstitusiyası maddə 47. Fikir və söz azadlığı 1. Hər kəsin fikir və söz azadlığı vardır.) və dərhal görürsən ki, yazdığın yazının rəy bölməsində sözün əsil mənasında "göbələk"lər meydana çıxır. Bəs yaxşı onda sual yaranır ki, həmin şəxslərin özləri nə üçün üzlərini ictimayətdən gizlədirlər? Onda yəqin onlar ya qorxurlar, ya heç nəyi veclərinə almırlar, ya da barələrində səslənən tənqidlərlə tam razıdırlar.
Bundan əlavə həmin şəxslərin trolları sanki yazılan yazılardan inciyib küsərək təhqirlərə yol verirlər. Ancaq, onlar anlamırlar ki, buna görə onlarla bərabər onların ağalarını ciddi məsuliyyət gözləyir. Düşünürəm ki, belə qanundankənar hallara yol verməkdənsə tənqid olunan şəxs və ya şəxslər öz hüquqlarını və mövqeylərini müdafiə etməklə özlərinin haqlı olduqlarını sübut edə bilərlər. Təbii ki, haqlı olduqları halda!

Azərbaycan Respublikasının konstitusiyası
Maddə 50. Məlumat azadlığı:
I. Hər kəsin istədiyi məlumatı qanuni yolla axtarmaq, əldə etmək, ötürmək, hazırlamaq və yaymaq azadlığı vardır.
II. Kütləvi informasiyanın azadlığına təminat verilir. Kütləvi informasiya vasitələrində, o cümlədən mətbuatda dövlət senzurası qadağandır.
III. Hər kəsin kütləvi informasiya vasitələrində dərc edilən və onun hüquqlarını pozan və ya mənafelərinə xələl gətirən məlumatı təkzib etmək və ya ona cavab vermək hüququna təminat verilir.

Hərbi ekspert Natiq Əlisoy

Dialoq.Az